सुनसरी । राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले वर्तमान राजनीतिक व्यवस्था र निर्वाचन प्रणालीप्रति कडा आपत्ति जनाउँदै मुलुक गम्भीर संकटतर्फ धकेलिएको चेतावनी दिएका छन् । सुनसरीको चक्रघट्टीमा आयोजित चुनावी सभालाई सम्बोधन गर्दै लिङ्देनले २०८४ मा हुनुपर्ने निर्वाचनलाई २०८२ मै जबरजस्ती गराइनुले समस्याको समाधान नहुने जिकिर गरे ।
अध्यक्ष लिङ्देनले सत्तापक्षले यही व्यवस्थालाई निर्विकल्प देखाउन खोजेको भन्दै आक्रोश व्यक्त गरे । उनले भने, “यही व्यवस्था ठिक छ र यही चुनावबाट जनताको अवस्था सुध्रिन्छ भनेर मुलुकलाई जबरजस्ती चुनावतर्फ लगियो भने समस्या केही समयका लागि टर्ला, तर पछि झन् जटिल र भयानक बन्नेछ । देश दुर्घटनातर्फ जाने निश्चित छ ।” उनका अनुसार समस्या केवल व्यक्ति वा पात्रमा मात्र नभई वर्तमान संसदीय व्यवस्थामा रहेकाले यसको समूल परिवर्तन आवश्यक छ ।
देशमा कोही पनि पक्ष उपेक्षित हुन नहुने धारणा राख्दै लिङ्देनले एक नयाँ राजनीतिक सहमतिको खाका प्रस्तुत गरे । उनले भने, “देशमा कसैले पनि आफूलाई निषेधित भएको महसुस नगर्ने वातावरण बनाउनुपर्छ । यसका लागि राजा, राजनीतिक दल र नवयुवा (जेन-जी) पुस्ताबीच नयाँ समझदारी हुनु अनिवार्य छ ।”
प्रजातन्त्र दिवसका अवसरमा पूर्वराजा ज्ञानेन्द्र शाहले दिएको सन्देशलाई एक सकारात्मक सुझावको रूपमा ग्रहण गर्न उनले अन्य राजनीतिक दलहरूलाई आग्रह समेत गरे ।
आगामी निर्वाचनलाई सामान्य प्रक्रिया मात्र नभई ‘देश रहने कि नरहने’ भन्ने गम्भीर प्रश्नसँग जोडिएको उनले दाबी गरे । सामाजिक सञ्जालको लहरमा नबगी गम्भीरतापूर्वक सोचेर मात्र मतदान गर्न उनले मतदातालाई आह्वान गरे ।
“देशलाई केन्द्रमा राख्दै ‘नेपाल प्रथम, नेपाली प्रथम’ को भावनासहित अघि बढ्न अब ढिला गर्नुहुँदैन,” लिङ्देनले भने । उनले व्यवस्था परिवर्तनका लागि निर्वाचनलाई एउटा आन्दोलनको रूपमा उपयोग गर्न कार्यकर्ताहरूलाई निर्देशन समेत दिए ।
