काठमाडौँ । आगामी निर्वाचनलाई लक्षित गर्दै निर्वाचन आयोगले देशव्यापी विशेष मतदाता शिक्षा अभियान शुरु गरेको छ। आयोगका सूचना अधिकारी सुमन घिमिरेका अनुसार, विगतका निर्वाचनमा देखिएका कमजोरी सुधार्दै यस पटक आयोगले आफैं नेतृत्वमा प्रभावकारी अभियान सञ्चालन गर्ने निर्णय गरेको हो।
आजदेखि शुरु भएको यो अभियान फागुन १७ गतेसम्म सञ्चालन हुने छ। घिमिरेका अनुसार, विगतमा स्थानीय तहका कर्मचारीहरूलाई स्वयंसेवकको रूपमा परिचालन गरिँदै आएकोमा यस पटक प्रत्येक वडामा एक–एक जना आयोगकै स्वयंसेवक नियुक्त गरिएको छ। “स्थानीय तहबाट सञ्चालित कार्यक्रममा अपनत्वको कमी देखिएपछि आयोगले आफ्नै स्वयंसेवक छनोट गरी तालिम दिएको हो,” उनले बताए।
स्वयंसेवकहरूले स्थानीय भाषा र परिवेशअनुसार मतदातालाई सही तरिकाले मतदान गर्ने विधि सिकाउनेछन्। यस पटकको मुख्य विशेषता ‘डिजिटल मतदाता शिक्षा’ रहेको छ। कागजको प्रयोग घटाउने उद्देश्यले पोस्टर र पम्प्लेटको सट्टा सामाजिक सञ्जाललाई प्राथमिकता दिइएको छ।
निर्वाचन आयोगको आधिकारिक फेसबुक पेज ‘इलेक्सन कमिसन नेपाल’ मार्फत उपलब्ध भिडियो, एनिमेसन र ब्रोसरहरू मतदातालाई देखाइने छन्। स्वयंसेवकहरूले घरदैलोमा पुग्दा नमूना मतपत्र र स्वस्तिक छापको प्रयोग गरी मतदान प्रक्रिया बुझाउने र मत बदर हुन नदिने तरिका सिकाउने छन्।
अभियानको प्रभावकारिता अनुगमन गर्न आयोगले प्रविधिको प्रयोग गरेको छ। हरेक स्थानीय तहका निर्वाचन सम्पर्क व्यक्तिहरूलाई अनुगमनको जिम्मेवारी दिइएको छ भने केन्द्रबाट ह्वाट्सएप ग्रुपमार्फत दैनिक रिपोर्टिङ र अनुगमन भइरहेको छ।
