रौतहट। रौतहटको इशनाथ नगरपालिकामा कारको ठक्करबाट चार वर्षीया बालिकाको मृत्यु भएको घटनामा संलग्न चालकलाई थप अनुसन्धानका लागि ५ दिन हिरासतमा राख्न अनुमति दिइएको छ।
जिल्ला अदालतले परोहा नगरपालिका–३ घर भएका २७ वर्षीय कार चालक शेख मुस्ताख विरुद्ध प्रहरीलाई ५ दिनको म्याद थप गरिदिएको हो। जिल्ला प्रहरी कार्यालय रौतहटका प्रवक्ता तथा प्रहरी नायब उपरीक्षक (डीएसपी) विष्णु प्रदीप बस्यालका अनुसार, हिरासतमा राखेर घटनाको विस्तृत अनुसन्धान गर्न अदालतले अनुमति दिएको हो।
गएको बिहीबार दिउँसो करिब २ बजे इशनाथ नगरपालिका–३, मठिया टोलमा बा १५ च ४२४४ नम्बरको कारले चार वर्षीया बालिका अल्फा खातुनलाई ठक्कर दिएको थियो। ठक्करबाट गम्भीर घाइते भएकी बालिकालाई उपचारका लागि अस्पताल लैजाने क्रममा ज्यान गएको थियो।
अनुसन्धानका क्रममा उक्त कार राष्ट्रिय स्वतन्त्र पार्टी (रास्वपा) का रौतहट क्षेत्र नम्बर २ का उम्मेदवार शेख सगिरको नाममा रहेको खुलेको छ। घटनाका समयमा उक्त सवारी साधन चुनावी प्रचारप्रसारमा प्रयोग भइरहेको थियो। यद्यपि, दुर्घटना हुँदा उम्मेदवार सगिर भने कारमा सवार नरहेको प्रहरीले पुष्टि गरेको छ।
प्रहरीले घटनाको प्रकृति र सवारी सुरक्षाका विषयमा थप अनुसन्धान अगाडि बढाएको छ।
