काठमाडौं । राष्ट्रपति रामचन्द्र पौडेल जापान सरकारको निमन्त्रणामा नेपाल–जापान कूटनीतिक सम्बन्ध स्थापनाको ७०औँ वार्षिकोत्सवका अवसरमा चारदिने औपचारिक भ्रमणका लागि आइतबार राति जापान प्रस्थान गर्दै छन्। परराष्ट्र मन्त्रालयका अनुसार राष्ट्रपति पौडेल माघ १८ देखि २१ गतेसम्म जापानमा रहनेछन्।
भ्रमणका क्रममा माघ २० गते टोकियोस्थित इम्पेरियल प्यालेसमा जापानका सम्राट् नारुहितोसँग राजकीय भेटवार्ता गर्ने कार्यक्रम छ। सोही दिन जापानका प्रधानमन्त्री ताकाइची सानेसँग पनि भेट हुने छ। माघ १९ गते राष्ट्रपति पौडेल ७०औँ वार्षिकोत्सवको विशेष समारोहमा सहभागी हुनेछन् तथा जापानका विदेश राज्यमन्त्रीसँग शिष्टाचार भेटवार्ता गर्ने कार्यक्रम छ।
भ्रमणका क्रममा जापानी व्यापारिक समुदायसँग भेटघाट र टोकियोस्थित नेपाली दूतावासले आयोजना गर्ने सम्मान कार्यक्रममा पनि राष्ट्रपति सहभागी हुनेछन्। राष्ट्रपति पौडेल माघ २१ गते काठमाडौं फर्कने कार्यक्रम छ।
