वीरगन्ज । पर्सा प्रहरीले १० लाख हुण्डीको रकम सहित तीन जनलााई पक्राउ गरेको छ । प्रहरी टोलीले पर्साको जगरनाथपुर गाउँपालिका वडा नं.३, गडैयाटोल स्थित सडकखण्डबाट उनीहरूलाई पक्राउ गरेको हो।
पक्राउ पर्नेहरूमा सखुवा प्रसौनी गाउँपालिका वडा नं.४ देवरवानाका २२ वर्षीय पवन कुमार साह, ३० वर्षीय मुस्ताक अन्सारी र १९ वर्षीय रामपुकार पासवान रहेका छन्।
उनीहरूको साथबाट स्रोत नखुलेको कुल १० लाख २ हजार १० रुपैयाँ नगद बरामद भएको छ। साथै, हुण्डी कारोबारमा प्रयोग गरिएको ना।१६ प ३०२० नम्बरको एनएक्सजी स्प्लेन्डर मोटरसाइकल समेत प्रहरीले नियन्त्रणमा लिएको छ।
पक्राउ परेका तीनै जना विरुद्ध मुलुकी अपराध संहिता, २०७४ को दफा १२५ (क) बमोजिम हुण्डी सम्बन्धी कारोबार गर्न नहुने कसूरमा अनुसन्धान अगाडि बढाइएको छ।
पर्सा जिल्ला अदालतबाट सात दिनको म्याद थप गरी उनीहरूमाथि विस्तृत अनुसन्धान भइरहेको प्रहरी प्रवक्ता एवं प्रहरी नायब उपरीक्षक राजु कार्कीले जानकारी दिए ।
