काठमाडौं । ३० वर्षे सेवा अवधि पूरा गरी सेवानिवृत्त हुन लागेका नेपाल प्रहरीका प्रहरी महानिरीक्षक (आईजीपी) चन्द्र कुबेर खापुङलाई बिदाई गरिएको छ ।
बुधबार नेपाल प्रहरी प्रधान कार्यालय, नक्सालमा फौजी परम्परा अनुसार भव्य समारोहको आयोजना गरेर सम्मानपूर्वक बिदाइ गरिएको हो ।
नवनियुक्त प्रहरी महानिरीक्षक दान बहादुर कार्कीले समारोहको नेतृत्व गर्दै आईजीपी खापुङ सहित एकै दिन अवकाश प्राप्त गर्न लागेका प्रहरी नायव महानिरीक्षकद्वय ईन्जिनियर फणिन्द्र बराल र संजीव शर्मा दासलाई शुभकामनासहित बिदाइ गरे।
समारोहलाई सम्बोधन गर्दै अवकाशोन्मुख महानिरीक्षक खापुङले नेपालको राजनीतिक संक्रमणकालीन अवस्थामा प्रहरी संगठनको मनोबल उच्च राख्न र संस्थाको अस्तित्व तथा प्रतिष्ठा जोगाउन आफूले सक्दो योगदान दिएको बताए।
उनले संगठनभित्र भाइचारा, एकता र अपनत्वभाव कायम गर्ने आफ्नो प्रयासलाई स्मरण गर्दै, नयाँ नेतृत्व र सम्पूर्ण प्रहरी सदस्यहरू मिलेर संगठनलाई अझ सुदृढ र सक्षम बनाउने अपेक्षा व्यक्त गरे।
आईजीपी खापुङले नवनियुक्त आईजीपी कार्कीलाई बधाई दिँदै उनी व्यावसायिक, कर्तव्यनिष्ठ र दूरदर्शी नेतृत्वको धनी भएको र उनको नेतृत्वमा नेपाल प्रहरी नयाँ उचाइमा पुग्ने दृढ विश्वास व्यक्त गरे।
यस क्रममा, निवर्तमान आईजीपी खापुङले आफ्नो कार्यकालमा सम्पन्न उल्लेखनीय कार्यहरू र प्रगतिहरू समेटिएको कार्यसम्पादन प्रतिवेदन नवनियुक्त आईजीपी कार्कीलाई हस्तान्तरण गरे।
सो अवसरमा आईजीपी कार्कीले सेवा अवधि पूरा गरी अवकाश लिन लागेका वरिष्ठ अधिकृतहरूलाई हार्दिक बधाई दिँदै अग्रजहरूले थालनी गरेको मौलिक कार्य र मूल्य–मान्यतालाई निरन्तरता दिँदै संगठनलाई अझ सबल बनाउने प्रतिबद्वता व्यक्त गरे।
उनले सेवा निवृत्त अधिकृतहरूबाट भविष्यमा पनि रणनीतिक सुझाव र सकारात्मक सल्लाह प्राप्त हुने विश्वास व्यक्त गरेका छन्।
