काठमाडौँ । प्रधानमन्त्री सुशीला कार्कीले आसन्न प्रतिनिधि सभा सदस्य तथा राष्ट्रिय सभा सदस्य निर्वाचन तोकिएको समयमा नै सम्पन्न गर्न सबै पक्षको सहयोग प्राप्त हुने विश्वास व्यक्त गरेकी छन्।
बुधबार सिंहदरबारमा निर्वाचन आयोगका पदाधिकारीहरूसँग भेटघाटका क्रममा प्रधानमन्त्री कार्कीले आगामी निर्वाचनलाई स्वच्छ, निष्पक्ष र भयरहित वातावरणमा सम्पन्न गर्न सरकार प्रतिबद्ध रहेको बताइन्।
भेटका क्रममा आयोगका प्रवक्ता नारायणप्रसाद भट्टराईले आयोगले मतदाता नामावली अद्यावधिक र निर्वाचन तयारीबारे प्रधानमन्त्रीलाई जानकारी दिएको बताए। उनका अनुसार,
“प्रधानमन्त्रीज्यू र आयोगका पदाधिकारीबीच आसन्न निर्वाचनलाई निष्पक्ष र व्यवस्थित रूपमा सम्पन्न गर्न आवश्यक पूर्वतयारी, मतदाता नामावलीको प्रगति तथा गर्नुपर्ने कामहरूबारे सघन छलफल भएको छ,”
भट्टराईले भने।
प्रधानमन्त्रीले आयोगका प्रयासको प्रशंसा गर्दै सरकारबाट आवश्यक सहयोग र समन्वय गरिने प्रतिबद्धता जनाएकी छन्। उनले भनिन्,
“सबै निकाय, राजनीतिक दल, सुरक्षाकर्मी तथा सरोकारवालाहरूको सहकार्यमा निर्वाचन निर्धारित मितिमै सम्पन्न हुनेछ।”
निर्वाचन आयोगले यसअघि नै प्रतिनिधि सभा सदस्य निर्वाचन फागुन २१ गते, र राष्ट्रिय सभा सदस्य निर्वाचन माघ ११ गते गर्ने मिति तय गरिसकेको छ। आयोगका अनुसार, दुवै निर्वाचनका लागि प्राविधिक तयारी तीव्र रूपमा अगाडि बढाइएको छ।
प्रधानमन्त्री कार्कीले निर्वाचनलाई लोकतान्त्रिक अभ्यासको आधारस्तम्भका रूपमा व्याख्या गर्दै निर्वाचन प्रक्रिया पारदर्शी, विश्वासिलो र जनअपेक्षाअनुरूप हुने विश्वास व्यक्त गरेकी छन्।
