मलंगवा । सर्लाहीको मलंगवा नगरपालिका वडा नं. ८ स्थित प्रसिद्ध हनुमान मन्दिरमा चोरी गरेको आरोपमा प्रहरीले दुई जना नाबालकलाई नियन्त्रणमा लिएको छ।
जिल्ला प्रहरी कार्यालय सर्लाहीका अनुसार कात्तिक ८ गते बिहान करिब ३ः०० बजे मन्दिरमा चोरी भएको खबर प्राप्त हुनासाथ खटिएको प्रहरी टोलीले १६ र १३ वर्षका दुई नाबालकलाई नियन्त्रणमा लिएको हो।
उनीहरू १८ वर्षमुनिका रहेकाले नाम भने सार्वजनिक गरिएको छैन। मन्दिरका पुजारीका अनुसार चोरहरूले हनुमानजीको मूर्तिमा चढाइएको चाँदीको मुकुट, चाँदीको माला, चाँदीको टीका, अनुहारमा लगाउने विभिन्न चाँदीका गहनाका साथै दान पेटिकामा रहेको रकमसमेत चोरी गरेका छन्।
प्रहरीको प्रारम्भिक अनुसन्धानबाट पक्राउ परेका दुवै नाबालक पटके चोर रहेको र यसअघि पनि चोरी प्रकरणमै बाल सुधार गृह बसेर छुटेका व्यक्ति भएको खुलेको छ।
जिल्ला प्रहरी कार्यालयका प्रवक्ता एवं सूचना अधिकारी प्रहरी निरीक्षक किशोर के.सी.का अनुसार यो घटना कुनै धर्म वा सम्प्रदाय लक्षित नभई विशुद्ध चोरीको मनसायले गरिएको प्रारम्भिक छानबिनबाट स्पष्ट भएको छ।
घटनामा अन्य व्यक्तिहरूको संलग्नेसमेत आशंका गरिएकाले पहिचान गरी कडा कारबाही गरिने प्रहरीले जनाएको छ। साथै, प्रहरीले यस घटनालाई लिएर कुनै पनि किसिमको धार्मिक तथा साम्प्रदायिक सद्भाव भड्काउने कार्य नगर्न सर्वसाधारणमा अनुरोध गरेको छ।
साम्प्रदायिक सद्भाव भड्काउने गतिविधि कानूनबमोजिम दण्डनीय हुने चेतावनी दिँदै घटनाको विस्तृत अनुसन्धान जारी रहेको प्रहरीले जनाएको छ।
