काठमाडौं । पाठेघरको मुखको क्यान्सर न्यूनीकरण गर्ने उद्देश्यसहित नेपाल सरकारले आजदेखि देशव्यापी रूपमा ह्युमन प्यापिलोमा भाइरस (HPV) विरुद्धको खोप अभियान सुरु गरेको छ। स्वास्थ्य सेवा विभागका अनुसार अभियान फागुन १५ गतेसम्म सञ्चालन हुनेछ।
स्वास्थ्य सेवा विभागको खोप शाखा प्रमुख डा. अभियान गौतमका अनुसार यस वर्षको अभियानमा कक्षा ६ मा अध्ययनरत सबै छात्रा, विद्यालय बाहिर रहेका १० वर्ष उमेरका किशोरी, साथै गत वर्ष खोप लगाउन छुटेका कक्षा ७ देखि १० सम्मका छात्रा र ११ देखि १४ वर्ष उमेरका विद्यालय बाहिर रहेका किशोरीहरूलाई लक्षित गरिएको छ।
नेपालमा महिलामा देखिने क्यान्सरमध्ये पाठेघरको मुखको क्यान्सर पहिलो स्थानमा रहेकाले यो अभियानलाई विशेष महत्त्व दिइएको स्वास्थ्य मन्त्रालयले जनाएको छ। एचपीभी खोपले उक्त क्यान्सर गराउने मुख्य कारक भाइरसबाट सुरक्षा प्रदान गर्ने चिकित्सकहरूको भनाइ छ।
यस पटक देशभर करिब साढे ३ लाख किशोरीलाई खोप लगाउने लक्ष्य राखिएको छ। यो खोप एक मात्र मात्रा (सिङ्गल डोज) लगाए पुग्ने र पूर्ण रूपमा सुरक्षित रहेको बताइएको छ।
खोप अभियान मुख्यतया विद्यालय केन्द्रित हुने छ। विद्यालय नजाने किशोरीहरूले भने नजिकको स्वास्थ्य संस्था वा तोकिएको खोप केन्द्रबाट सेवा लिन सक्नेछन्। स्थानीय तहअनुसार खोप दिने मिति फरक पर्न सक्ने भएकाले सम्बन्धित वडा कार्यालय वा विद्यालयसँग सम्पर्क गर्न स्वास्थ्य मन्त्रालयले आग्रह गरेको छ।
स्वास्थ्य मन्त्रालयका अनुसार महिनावारी भएका बेला पनि एचपीभी खोप लगाउन सुरक्षित हुन्छ र यसले प्रजनन स्वास्थ्यमा कुनै नकारात्मक असर गर्दैन।
