काठमाडौँ । विस्तृत शान्ति सम्झौता भएको आज २० बर्ष भएको छ ।
याे ऐतिहासिक दिनको अवसरमा नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले एक वक्तव्य जारी गर्दै शान्ति प्रक्रियाका बाँकी कामहरू अविलम्ब पूरा गर्न सबै राजनीतिक दल, सरकार र सरोकारवाला पक्षहरूसँग आग्रह गरेका छन्।
वि.सं. २०६३ मंसिर ५ गते तत्कालीन प्रधानमन्त्री गिरिजाप्रसाद कोइराला र तत्कालीन नेकपा (माओवादी) का अध्यक्षका रूपमा आफूले हस्ताक्षर गरेको स्मरण गराउँदै नेता प्रचण्डले यो सम्झौता नेपाली जनताको त्याग, बलिदान र परिवर्तनको आकांक्षाबाट निर्मित राष्ट्रिय सहमतिको ऐतिहासिक दस्तावेज भएको बताएका छन्।
शान्ति सम्झौताको जगमा संविधानसभाको निर्वाचन, संघीय लोकतान्त्रिक गणतन्त्रको स्थापना, समावेशी लोकतन्त्र र संविधान निर्माणजस्ता युगान्तकारी उपलब्धि हासिल भएको उल्लेख गर्दै उनले अझै पनि संक्रमणकालीन न्यायका बाँकी कामहरू पूर्ण रूपमा कार्यान्वयन हुन नसकेको स्वीकार गरेका छन्।
विशेष गरी द्वन्द्वपीडितलाई न्याय, सत्य निरुपण तथा मेलमिलाप र बेपत्ता पारिएका व्यक्तिको अवस्था सार्वजनिक गर्ने दायित्व अझै बाँकी रहेको भन्दै उनले पीडितको भावना र सम्झौताको मूल मर्मअनुसार संक्रमणकालीन न्यायको प्रक्रियालाई तार्किक निष्कर्षमा पुर्याउनु आजको राष्ट्रिय आवश्यकता भएकोमा जोड दिएका छन्।
सो ऐतिहासिक अवसरमा संयोजक प्रचण्डले समावेशी संघीय लोकतान्त्रिक गणतन्त्रका लागि जीवन आहुति दिने महान् सहिद तथा बेपत्ता योद्धाहरूप्रति उच्च सम्मान व्यक्त गर्दै शान्ति प्रक्रियामा योगदान पुर्याउने सम्पूर्ण राजनीतिक दल, नागरिक समाज, सुरक्षाकर्मी र आम नागरिकप्रति आभार प्रकट गरेका छन्।



