काठमाडौं । भोटेकोशी नदीमा आएको विनाशकारी बाढीमा फसेका २१ जना भारतीय तीर्थयात्रीहरूलाई नेपाली सेनाले सकुशल उद्धार गरी स्वदेश फर्काएको छ।
भारत फर्किएलगत्तै ती पर्यटकहरूले नयाँ दिल्लीमा भारतीय विदेशमन्त्री डा. एस. जयशंकरसँग भेट गर्दै नेपाली सेना र नेपाल सरकारको समयमै भएको उद्धार प्रयासप्रति विशेष धन्यवाद व्यक्त गरेका छन्।
तमिलनाडुका ती पर्यटकहरू धार्मिक यात्राका क्रममा नेपाल आएका बेला भोटेकोशी क्षेत्रमा अचानक आएको बाढीका कारण अप्ठ्यारोमा परेका थिए।
नेपाली सेनाले प्रतिकूल मौसमका बाबजुद हवाई तथा स्थल मार्गमार्फत उद्धार टोली खटाएर उनीहरूलाई सुरक्षित स्थानमा ल्याएको थियो।
उद्धार गरिएका नागरिकहरूसँगको प्रत्यक्ष कुराकानीपछि भारतीय विदेशमन्त्री डा.एस. जयशंकरले सामाजिक सञ्जाल ‘एक्स’ मार्फत नेपाली सेना, नेपाल सरकार र समन्वय गर्ने काठमाडौंस्थित भारतीय दूतावासलाई धन्यवाद दिएका छन्।
उनले विपद्को कठिन घडीमा नेपाली सेनाले देखाएको तदारुकता र मानवीय सेवाको उच्च प्रशंसा गरेका छन् । स्वदेश फर्किएका पर्यटकहरूले पनि नेपाली सेनाले संकटको समयमा देखाएको तत्परता, आत्मीयता र सुरक्षित उद्धारका लागि हृदयदेखि नै कृतज्ञता प्रकट गरेका छन्।
