जनकपुरधाम । मधेश प्रदेशको गृह, सञ्चार तथा कानुन मन्त्रालयले प्रदेशभित्रका आठवटै जिल्लाका नेपाल पत्रकार महासंघ जिल्ला शाखालाई आधुनिक सञ्चार तथा सूचना प्रवाह सामग्री हस्तान्तरण गरेको छ।
मन्त्रालय परिसरमा आयोजित एक कार्यक्रमका बीच मधेश प्रदेशका गृह, सञ्चार तथा कानुन मन्त्री फकिरा महतोले महासंघका जिल्ला अध्यक्ष तथा पदाधिकारीहरूलाई कम्प्युटर, प्रोजेक्टर र प्रिन्टर लगायतका प्रविधिजन्य उपकरणहरू औपचारिक रूपमा हस्तान्तरण गरेेका हुन् ।
कार्यक्रमलाई सम्बोधन गर्दै मन्त्री फकिरा महतोले प्रविधिको यो युगमा पत्रकारिता क्षेत्रलाई थप सबल, प्रतिस्पर्धी र प्रविधिमैत्री बनाउन सरकार प्रतिबद्ध रहेको बताए।
“जिल्ला तहमा रहेर सीमित स्रोत-साधनका बीच काम गरिरहेका पत्रकार साथीहरूलाई प्रविधिसँग जोड्न र सूचना प्रवाहलाई थप व्यवस्थित बनाउन यी सामग्रीहरूले महत्त्वपूर्ण भूमिका खेल्नेछन्,” मन्त्री महतोले भने, “नागरिकलाई सत्य, तथ्य र निष्पक्ष सूचना पुर्याउने कार्यमा सञ्चारकर्मीहरूको योगदान अतुलनीय छ, त्यसैले महासंघको संस्थागत विकास र भौतिक सुदृढीकरणका लागि प्रदेश सरकार सधैं तत्पर रहनेछ।”
उनले आगामी बजेट र नीतिहरूमा पनि मधेश प्रदेशको समग्र सञ्चार क्षेत्रको क्षमता अभिवृद्धि, लोककल्याणकारी विज्ञापन व्यवस्थापन र पत्रकारहरूको वृत्तिविकासका कार्यक्रमहरूलाई प्राथमिकतामा राखिने स्पष्ट पारे ।
हस्तान्तरण कार्यक्रममा उपस्थित नेपाल पत्रकार महासंघका प्रतिनिधिहरूले प्रदेश सरकारको यो प्रयासको प्रशंसा गर्दै धन्यवाद ज्ञापन गरेका छन्।
आधुनिक प्रविधिसहितका उपकरण प्राप्त भएपछि जिल्ला शाखाहरूको दैनिक प्रशासनिक कार्यका साथै सूचना संकलन, प्रशोधन र डिजिटल अभिलेखीकरणमा ठूलो राहत पुग्ने महासंघका पदाधिकारीहरूको भनाइ थियो।
कार्यक्रममा मन्त्रालयका सचिव, उच्चपदस्थ अधिकारीहरूका साथै मधेश प्रदेशका विभिन्न जिल्लाबाट आएका पत्रकार महासंघका पदाधिकारी एवं सञ्चारकर्मीहरूको उपस्थिति रहेको थियो।
