वीरगन्ज। वीरगन्ज महानगरपालिका वडा नम्बर ३१ स्थित श्री रेडक्रस आधारभूत विद्यालय, लक्ष्मीपुरमा विद्यालय प्रशासनको चरम लापरबाही र वित्तीय अनियमितता सार्वजनिक भएको छ।
अभिभावकहरूले विद्यालयको वस्तुस्थिति अनुगमन गर्दा प्रधानाध्यापक प्रधानाध्यापक लक्ष्मण साह आफैं अनुपस्थित रहेर पनि आफ्नो हाजिरी बनाएको फेला परेको छ।
यसका साथै, विद्यालयमा अनुपस्थित रहेका विद्यार्थीहरूको समेत पछिबाट हाजिरी भरेर सरकारी सेवा सुविधा र भत्ता लिने जस्ता गम्भीर फर्जी कार्य पटक(पटक हुँदै आएको अनुगमनका क्रममा खुलासा भएको छ।
गुणस्तरीय शिक्षाको धज्जी उडाउँदै प्रअ साहले व्यक्तिगत स्वार्थका लागि यस्ता गैरजिम्मेवार क्रियाकलाप सञ्चालन गरेपछि आक्रोशित अभिभावकहरूले यसबारे महानगरपालिकाको शिक्षा महाशाखामा लिखित तथा मौखिक जानकारी गराएका थिए।
तर, सम्बन्धित निकायले यस विषयमा कुनै किसिमको पहल, परामर्श वा छानबिन अगाडि नबढाएको भन्दै अभिभावकहरूले शिक्षा महाशाखाको भूमिकामाथि पनि प्रश्न उठाएका छन्। नियमनकारी निकायको यस्तो मौनताले विद्यालयको बेथिति झन् बढेको उनीहरूको गुनासो छ।
यस विषयमा स्थानीय वडा अध्यक्ष जितेन्द्र प्रसाद यादवले गम्भीर चासो व्यक्त गरेका छन् । विद्यालयजस्तो पवित्र ठाउँमा विद्यार्थी र शिक्षक दुवैको नक्कली हाजिरी खडा गरी राज्यकोषको दुरुपयोग हुनु र बालबालिकाको भविष्यमाथि खेलबाड गरिनु निन्दनीय भएको वडा अध्यक्ष यादवले बताए ।
शिक्षा महाशाखाले देखाएको उदासीनताप्रति असन्तुष्टि जनाउँदै उनले यस गैरजिम्मेवार र फर्जी कार्यको तत्काल निष्पक्ष छानबिन हुनुपर्ने र दोषीउपर कडा कानुनी कारबाही गरिनुपर्ने माग गरेका छन् ।
वडा कार्यालयले यस बेथितिका विरुद्ध र गुणस्तरीय शिक्षाको अधिकार सुनिश्चित गर्न थप कदम चाल्ने प्रतिबद्धता समेत जनाएको छ।
