मोरङ । मोरङको सुनवर्षी नगरपालिका-६ स्थित पटियापाडा माध्यमिक विद्यालयको मतदान केन्द्रमा खटिएका सहायक मतदान अधिकृत रञ्जित शिवालाई प्रहरीले नियन्त्रणमा लिएको छ। निर्वाचनको पूर्वतयारीमा सघाउनुको साटो मादक पदार्थ र मासुको माग गर्दै मुख्य निर्वाचन अधिकृतलाई अभद्र व्यवहार गरेपछि उनलाई प्रहरीले नियन्त्रणमा लिएको हो।
बुधबार दिउँसो मतदान केन्द्र पुगेका शिवाले काममा खटिनुको साटो “मैले पहिला पनि चुनाव गराएको हुँ, त्यतिबेला माछा र बियर खुवाउँथे, यहाँ के–के व्यवस्था छ?” भन्दै हप्काउन सुरु गरेका थिए। राति निर्वाचन टोली तयारीमा जुट्दा उनले “मेरो बिहान ढिलोसम्म सुत्ने बानी छ, तिमीहरू आफैँ उठेर काम गर्दै गर्नु” भन्दै टोलीलाई आदेश दिएका थिए।
सम्झाउन खोज्दा उल्टै आक्रामक बनेपछि मोरङका प्रहरी प्रमुख एसपी कोवित कटवालको निर्देशनमा उनलाई नियन्त्रणमा लिइएको हो।
नेपाल विद्युत् प्राधिकरणका कर्मचारी रहेका शिवाको ठाउँमा तत्काल अर्को कर्मचारी खटाएर मतदान प्रक्रिया सुचारु गरिएको छ। मतदान अधिकृत यदीबहादुर श्रेष्ठका अनुसार, शान्तिपूर्ण मतदानमा बाधा पुऱ्याउने व्यवहार देखाएपछि यो कदम चालिएको हो।
