इटहरी । राष्ट्रिय स्वतन्त्र पार्टी (रास्वपा) का वरिष्ठ नेता बालेन्द्र साह ‘बालेन’ ले नेपालमा उद्योगमैत्री वातावरण निर्माण गर्न राजनीतिक सिन्डिकेट र चन्दा आतंकको अन्त्य हुनुपर्ने बताएका छन्। मंगलबार इटहरीमा आयोजित रास्वपाको बृहत् राजनीतिक सभालाई सम्बोधन गर्दै उनले यस्तो धारणा राखेका हुन्।
पूर्वमेयर समेत रहेका नेता बालेनले हाल नयाँ उद्योग स्थापना गर्न उद्यमीहरूले १० ठाउँमा नेता र कर्मचारीलाई खुसी पार्नुपर्ने बाध्यता रहेको टिप्पणी गरे। उनले भने:
“अहिले नयाँ फ्याक्ट्री खोल्नुपर्यो भने १० वटा नेतालाई ढोग्नुपर्छ, १० वटा कर्मचारीलाई फकाउनुपर्छ। अनि बल्ल-बल्ल फ्याक्ट्री खुल्छ। तर विडम्बना, सञ्चालनमा आएपछि फेरि चन्दा आतंक सुरु हुन्छ। रास्वपाले यस्तो व्यवस्था बनाउन चाहन्छ, जहाँ उद्योगीले ढुक्क भएर काम गर्न पाउनुन्।”
आगामी चैत ५ को निर्वाचनलाई लक्षित गर्दै बालेनले पूर्वी तराईको कृषि सम्भावनामाथि पनि जोड दिए। उनले पूर्वी तराईका ४ जिल्ला (झापा, मोरङ, सुनसरी र सप्तरी) मा मात्रै पूर्ण क्षमतामा धान उत्पादन गर्ने हो भने देशभरका नागरिकलाई खाद्यान्न अभाव नहुने दाबी गरे।
“हामीसँग क्षमता छ, तर व्यवस्थापन छैन। आफ्नै देशको माटोले सबैलाई खुवाउन सक्ने भए पनि हामी आयातमा निर्भर छौँ। यो दुखलाई समाधान गर्न अब उत्पादनमुखी राजनीति आवश्यक छ,” उनले भने।
काठमाडौँ महानगरपालिकाको प्रमुख पदबाट राजीनामा दिएर रास्वपामा प्रवेश गरेपछि बालेन देशव्यापी चुनावी अभियानमा व्यस्त छन्। उनलाई रास्वपाले भावी प्रधानमन्त्रीको रूपमा अघि सारेको छ। विशेषगरी झापा निर्वाचन क्षेत्र नं ५ मा एमाले अध्यक्ष केपी शर्मा ओलीसँगको सम्भावित प्रतिस्पर्धा र सुनसरी-मोरङको चुनावी माहोलले गर्दा बालेनको यो अभिव्यक्तिलाई राजनीतिक वृत्तमा अर्थपूर्ण रूपमा हेरिएको छ।
