वीरगञ्ज । नेपाल प्रहरीका महानिरीक्षक (आइजीपी) दानबहादुर कार्कीले वीरगञ्ज महानगरपालिका–२५, सिरिसियास्थित मानव सेवा आश्रमको अवलोकन भ्रमण गरेका छन् ।
मधेस प्रदेशको सुरक्षा सम्मेलनमा जनकपुर आएका आईजीपी कार्की माघे सङ्क्रान्तिको अवसर पारेर बिहीबार आश्रम आईपुगेका हुन् । आइजीपी कार्कीले आश्रममा रहेका आश्रित बुवाआमाहरूसँग समय बिताउनुका साथै खाजा सेवा र अति आवश्यक खाद्यान्न सामग्री प्रदान गरे ।
उनले आश्रमको सेवा कार्यमा व्यक्तिगत रूपमा १० हजार रुपैयाँ नगद सहयोग समेत हस्तान्तरण गरे
सो अवसरमा मधेस प्रदेश प्रहरी प्रमुख प्रहरी नायव महानिरीक्षक गोविन्द थपलिया र पर्सा जिल्ला प्रहरी प्रमुख प्रहरी उपरीक्षक सुदिपराज पाठकको पनि उपस्थिति रहेको थियो ।
आश्रमका संस्थापक देवेश गुप्ताका अनुसार प्रहरी टोलीले आश्रममा रहेका असहाय र बेसहारा नागरिकहरूसँग साक्षात्कार गर्दै मानवीय सेवाको भावना प्रकट गरेको थियो ।
अवलोकनका क्रममा आइजीपी कार्कीले मानव सेवा आश्रमले सडक आश्रित र बेसहारा नागरिकहरूको व्यवस्थापनमा गरिरहेको कार्य अत्यन्तै सराहनीय र उदाहरणीय रहेको बताए ।
प्रहरी महानिरीक्षक कार्कीले मानवीय सेवामा नेपाल प्रहरीको सदैव साथ रहने प्रतिबद्धता जनाउँदै आश्रमको सुरक्षा र सहयोगका लागि प्रहरीको तर्फबाट चौबिसै घण्टा एक जना जनशक्ति खटाइएको जानकारी दिए ।
उनले आगामी दिनमा पनि प्रहरी प्रशासनको तर्फबाट हुन सक्ने सम्भावित सबै प्रकारका सहयोग जारी रहने विश्वास दिलाए ।
कार्यक्रममा आश्रमका अभिभावकहरू प्रकाश थारु, कमल चौगाई, डा. निरज सिंह, डा. प्रिति यादव र मौसमी श्रेष्ठको उपस्थिति थियो ।
त्यसैगरी आश्रमका स्वयंसेवकहरू ओमकुमार झा, सोनु चौरसिया, पियुष कानुन, सुजित गुप्ता, प्रधुमन सर्राफ, पवन कलवार र आर्यन गुप्ता लगायतले कार्यक्रम व्यवस्थापनमा सहयोग गरेका थिए ।
