वीरगन्ज । नेपालका थारु समुदायले मनाउने माघी (खिचडी) वीरगन्जमा धुमधामले मनाईएको छ । माघ १ गते थारु सम्वत नयाँबर्षको रुपमा मनाउने गरेका थारु समुदायले बिहीबार वीरगन्जको घण्टाघरमा भेला भएर विभिन्न भेषभूषा, संस्कृति झल्किने पहिरन र झाँकी सहितको ¥याली वीरगन्जको स्वीमिङ्गपुलमा पुगेर भव्य सभाको आयोजना गरेको थियो ।
माघी मूल समारोह समितिका संयोजक जंग बहादुर चौधरीको अध्यक्षतामा भएको कार्यक्रममा प्रमुख अतिथि समाजसेवी लक्ष्मी नारायण बण्ठाले पानसमा दीप प्रज्जवलन गरेर कार्यक्रमको उदघाटन गरेका थिए ।
सभामा बोल्ने वक्ताहरुले आदिवासी जनजाति समुदायको भाषा, संस्कृतिमा राज्यको विभेद बर्षौसम्म रहँदा पछाडि परेको बताउदै अब संविधानमा उल्लेख भए अनुसारको अधिकार सुनिश्चित गर्नुपर्ने बताएका थिए ।
कार्यक्रममा मधेस प्रदेश सरकारका वन तथा वातावरण मन्त्री शंकर चौधरी, संविधानसभा सदस्य जयप्रकाश थारु, बारा निर्वाचन क्षेत्र नम्बर ४ का प्रदेशसभा सदस्य देव नारायण चौधरी, जीतपुर सिमरा उपमहानगरपालिकाका प्रमुख राजन पौडेल,
नेपाल आदिवासी जनजाति पत्रकार महासंघ मधेस प्रदेशका पूर्व इञ्चार्ज नीरज पिठाकोटे मगर, थारु कल्याणकारिणी सभाका केन्द्रीय पार्षद नन्दकिशोर पञ्जियार, प्याब्सन पर्साका अध्यक्ष सरोज चौधरी लगायत विभिन्न पालिकाका वडा अध्यक्षहरु, विभिन्न संघ संस्थाका प्रतिनिधिले पनि शुभकामना व्यक्त गरेका थिए ।
माघी मूल समारोह समितिका सुरक्षा समितिका संयोजक विकास चौधरीले स्वागत गरेको कार्यक्रममा थारु समुदायमा प्रख्यात घाटु नाच, समाचकेवा, पूर्वी थारु नाच लगायत विभिन्न विद्यालयबाट थारु गीत संगीतमा नृत्यु प्रस्तुत गर्दै भव्य मनोरञ्जनले दर्शकहरु झुम्मिएका थिए ।
हरेकबर्ष मनाउदै आएको माघी (खिचडी) मा रक्तदान, थारु समुदायले बनाउने विभिन्न खानाका परिकारका स्टलहरु तथा सांस्कृतिक कार्यक्रमहरुमा आदिवासी समुदाय मात्रै नभई अन्य समुदायले पनि भरपूर उपस्थितिले साथ दिनुका साथै मनोरञ्जन समेत लिएका थिए ।
कार्यक्रमको सञ्चालन विजया ओझैया र मनोज चौधरीले गरेका थिए । कार्यक्रमको व्यावस्थापनमा थारु नागरिक समाज बारा, पर्सा, रौतहटका संयोजक परमानन्द थारुले संयोजनकारी भूमिका खेलेका थिए ।
