आज राष्ट्रियसभा सदस्य निर्वाचनका उम्मेदवारको नामावली प्रकाशन

काठमाडौं । निर्वाचन आयोगले राष्ट्रियसभा सदस्य निर्वाचन कार्यक्रमअन्तर्गत आज उम्मेदवारको नामावली प्रकाशन गर्दैछ । हिजो र आज मनोनयनपत्र तथा उजुरीउपर जाँचबुझ गरी नामावली सार्वजनिक गर्न लागिएको हो ।

आयोगबाट स्वीकृत कार्यक्रमअनुसार बुधबार सातै प्रदेश राजधानीस्थित निर्वाचन अधिकृतको कार्यालयमा उम्मेदवारको मनोनयनपत्र दर्ता भएको थियो ।

पुस २७ गते उम्मेदवारले नाम फिर्ता लिन सक्नेछन् भने सोही दिन अन्तिम नामावली प्रकाशन हुनेछ । पुस २८ गते उम्मेदवारलाई निर्वाचन चिह्न प्रदान गरिनेछ ।

राष्ट्रियसभामा रिक्त हुने १८ सदस्यका लागि निर्वाचन हुन लागेको हो । माघ ११ गते बिहान ९ बजेदेखि दिउँसो ३ बजेसम्म मतदान हुनेछ ।