वीरगञ्ज । वीरगञ्ज महानगरपालिका–२, छप्कैयास्थित बिरयानी हाउस अगाडि बेवारिसे अवस्थामा फेला परेको एउटा शंकास्पद सुटकेशका कारण बुधबार साँझ स्थानीय क्षेत्रमा केही समयका लागि खैलबैला मच्चिएको छ।
जिल्ला प्रहरी कार्यालय, पर्साका अनुसार, बुधबार साँझ करिब ६ः०० बजे खैरो रङको सुटकेश बेवारिसे अवस्थामा भेटिएको सूचना प्रहरी बिट छप्कैयालाई प्राप्त भएको थियो।
सूचना पाउने बित्तिकै प्रहरी हवल्दार रञ्जन राज पाण्डेको कमाण्डमा प्रहरी टोली तत्काल घटनास्थलमा पुगेको थियो। सुटकेश शंकास्पद देखिएपछि घटनास्थललाई तत्काल सुरक्षा घेरामा राखिएको थियो।
थप अनुसन्धानका लागि वडा प्रहरी कार्यालय विर्ता, पर्साबाट प्रहरी निरीक्षक बिक्रम सुवेदीको कमाण्डमा थप टोली समेत परिचालन गरिएको थियो।
सुरक्षा संवेदनशीलतालाई ध्यानमा राख्दै नेपाली सेनाको बम डिस्पोजल टोलीलाई घटनास्थलमा बोलाईएको थियो। श्री जनगण वीरगञ्जबाट ७ जनाको विशेष बम डिस्पोजल टोलीले सुरक्षित तरिकाले उक्त सुटकेशलाई ‘डिस्पोज’ (नष्ट) गरेको हो।
बम डिस्पोजल टोलीद्वारा गरिएको परीक्षणका क्रममा सुटकेश भित्र कुनै प्रकारको विस्फोटक पदार्थ नभएको पुष्टि भएको छ। यससँगै तत्काल कुनै पनि जोखिम नरहेको निष्कर्ष निकालिएको छ।
प्रहरीले घटनाको कारण र सुटकेश कसले छाड्यो भन्ने सम्बन्धमा थप अनुसन्धान कार्य जारी रहेको जनाएको छ।
