हेटौंडा । गएको भदौ २४ गते भएको ‘जेन–जेड आन्दोलन’ का क्रममा मकवानपुरमा आपराधिक उपद्रव र आगजनी गरेको अभियोगमा पाँच जनालाई नियन्त्रणमा लिई आवश्यक कारवाही अघि बढाइएको छ।
जिल्ला प्रहरी कार्यालय मकवानपुरका अनुसार, हेटौंडा उपमहानगरपालिका वडा नम्बर ११ नवलपुर बस्ने वर्ष ४५ का सुशिल पौडेलको घरमा आगजनी तथा तोडफोड गरेको कसुरमा सोही स्थानका वर्ष ३६ का सुजन अधिकारी र वर्ष ३५ का सुरेन्द्र राना मगरलाई नियन्त्रणमा लिइएको छ।
उनीहरूलाई सम्मानित मकवानपुर जिल्ला अदालत, हेटौंडाबाट आपराधिक उपद्रव कसुरमा म्याद थप गरी अनुसन्धान भइरहेको छ।
यसैगरी, बागमती प्रदेश सभा सचिवालयको भवन र जिल्ला ट्राफिक प्रहरी कार्यालय मकवानपुरको भवनमा तोडफोड र आगजनी गर्ने कार्यमा संलग्न तीन जनालाई पनि प्रहरीले पक्राउ गरेको छ।
पक्राउ पर्नेहरूमा सर्लाही जिल्ला, बरहथवा नगरपालिका वडा नम्बर १ बस्ने वर्ष २७ की पुनम ठाकुर, सोही ठाउँका वर्ष २७ का प्रमोद महतो र जिल्ला मकवानपुर, हेटौंडा उपमहानगरपालिका वडा नम्बर ०८ बस्ने वर्ष ४३ का सागर घताने भन्ने रोम बहादुर घताने रहेका छन्।
पक्राउ परेका सबै पाँचै जनामाथि आवश्यक कानूनी कारवाही अघि बढाइएको जिल्ला प्रहरी कार्यालय मकवानपुरले जनाएको छ।
