वीरगन्ज । चाडपर्वमा वस्तु र सेवामा उपभोक्ताहरु व्यापक ठगीमा पर्ने गरेका छन् । नेपालमा राजस्व चुहावट गरेको भन्दै विवादमा तानिएका अटोमोबाईल्स कम्पनीहरु र आधिकारिक बिक्रेताहरुबाट उपभोत्ताहरु पनि ठगीने गरेको गुनासो बढेको छ ।
चाडपर्वको अवसरमा उपभोत्ताले साना र हलुका सवारी साधनहरु पनि बढी खरिद गर्ने भएकोले विभिन्न छुट अफर र एक्चेञ्जको नाममा बिक्रेताहरुले उपभोत्तालाई ठगी गर्ने गरेको गुनासो बढेको हो ।
विशेषगरी मोटरसाईकल कम्पनी र बिक्रेताहरुबाट मोटरसाईकल खरिद गर्ने उपभोत्ताहरु ठगीने गरेका छन् । छुट र एक्चेञ्ज अफरको प्रचार गर्ने र मोटरसाईकल खरिद गरेपछि त्यसको केही पार्टपुर्जाहरु कम्पनीले नदिने भन्दै छुट्टै खरिद गर्नुपर्ने बाध्यात्मक अवस्था बिक्रेताहरुले सृजना गर्ने गरेको उपभोत्ताहरुको गुनासो छ ।
संघीय सरकारको अनुगमन गर्ने निकाय वाणिज्य तथा उपभोत्ता हित संरक्षण कार्यालयको भएपनि अहिले चाडपर्वमा खाद्यवस्तुहरुको अनुगमनमा मात्रै केन्द्रीत हुँदा अटोमोबाईल्स कम्पनी र बिक्रेताहरुले खुलेआम उपभोत्तालाई ठगी रहेका छन् ।
मोटरसाईकल खरिद गर्न जाने उपभोत्ताहरुलाई वस्तु छनौटको अधिकार भएपनि मोटरसाईकलमै आउने पाटपूर्जाहरुको पनि उपभोत्ताले छुट्टै मूल्य तिर्न बाध्य छन् ।
बिक्रेताहरुले कम्पनीले नै बिक्रेतालाई नदिने भन्दै मोटरसाईकलको लेगगार्ड समेत उपभोत्तालाई छुट्टै किन्न लगाउने गरेका छन् । उपभोत्ताले बिक्रेताको शोरुमबाट लेगगार्ड खरिद नगरेर बाहिर खरिद गर्छु भन्दापनि फाईनान्सर र इन्स्योरेन्सको बाहानाले उपभोत्तालाई शोरुममै मोटरसाईकलको लेगगार्ड खरिद गर्न बाध्य पार्ने गरेको एक ग्राहकले बताए ।
पहिले मोटरसाईकलको मूल्य भन्ने त्यसपछि सेवा शुल्क, नामसारी लगायतका नाममा शुल्कहरु थप्दै मोटरसाईकलको लागत मूल्य बढाउने गरेको ग्राहकको गुनासो छ ।
बाणिज्य तथा उपभोत्ता हित संरक्षण कार्यालयले अटोमोबाईल्स क्षेत्रमा अनुगमन नै गर्न भ्याएको छैन । दशैंमा खाद्यवस्तुहरुकै अनुगमनमा बढी व्यस्त हुने भएको र अहिले कपडा पसलहरुको समेत अनुगमन भईरहेकोले दशैंपछाडि भने अटोमोबाईलक्षेत्रको अनुगमन गर्ने बाणिज्य तथा उपभोत्ता हित संरक्षण कार्यालय वीरगन्जका प्रमुख सुनिल चौरसियाले बताए ।
अटोमोबाईल्समा आयात बिन्दुदेखि नै राजस्व छलि मात्रै होईन लागत मूल्य र अतिरिक्त मूल्यहरु जोड्दै उपभोत्ता ठग्ने गरेपनि त्यस्ता कम्पनीहरु अझै कारवाहीको दायरामा नआएको उपभोत्ता हित संरक्षण मञ्चका केन्द्रीय उपाध्यक्ष अजय अधिकारी बताउछन् ।
ठूला आयातकर्ताहरु राज्यको अर्थतन्त्र सञ्चालनमै प्रभाव पार्नसक्ने खालका शक्तिशाली हुने र उनीहरुका डिलर बिक्रेताहरु पनि आयातकर्ताहरुकै शर्त र निर्देशन अनुसार कमिसनको आधारमा व्यावसाय गर्ने भएकोले उनीहरुले पनि कम्पनीको नाम देखाएर पन्छिने गरेका छन् ।
