वीरगन्ज । रसुवाको भोटेकोशी नदीमा आएको बाढीमा परी सम्पर्कविहीन भएका वीरगंज–२२ जगरनाथपुरका ६ जनाको परिवारलाई वीरगंज महानगरपालिकाले राहत उपलब्ध गराउने भएको छ।
गत भदौ १० गते बिहान आएको बाढीमा परी बेपत्ता भएका युवाहरूको अवस्था अझै अज्ञात रहेको समयमा महानगरप्रमुख राजेशमान सिंह र पूर्वमन्त्री प्रदीप यादवले आइतबार पीडित परिवारलाई भेटेर आवश्यक सहयोग, राहत तथा खोजी कार्यका लागि समन्वय गर्ने प्रतिबद्धता जनाएका हुन्।
टिमुरेस्थित मोटरसाइकल ग्यारेजमा काम गर्दै आएका साहबुद्दिन मन्सुरी, राहुल मियाँ, सरताज मियाँ, समिम आलम, सर्फराज मियाँ र बेत्रावतीमा कार्यरत रिजवान अन्सारी बाढी आएयता परिवारको सम्पर्कमा छैनन्।
पहिचानका लागि परिवारजनले रगतको नमुना बुझाएर डीएनए परीक्षणको प्रतीक्षा गरिरहेका छन्। नगरप्रमुख सिंहले बेपत्ता परिवारको अनिश्चितता र पीडामा महानगरपालिका साथमा रहने बताउँदै जगरनाथपुरका ६ परिवारका साथै भोटेकोशी बाढीमा परेका वीरगंजका अन्य प्रभावित परिवारलाई समेत राहत र आवश्यक सहजीकरण उपलब्ध गराइने जानकारी दिए।
