काठमाडौं । बाढीपहिरो प्रभावित दुर्गम क्षेत्रमा आपतकालीन राहत तथा अत्यावश्यक सामग्री ढुवानीलाई तीव्रता दिन अमेरिकी दूतावास र सेभेन समिट ट्रेक्सले सशस्त्र प्रहरी बल (एपीएफ) नेपाललाई अत्याधुनिक कार्गो ड्रोन हस्तान्तरण गरेका छन्।
काठमाडौँमा आयोजित एक कार्यक्रमका बीच अमेरिकी दूतावासका नियोग उपप्रमुख स्कट अर्बोम, सार्वजनिक मामिला प्रमुख माइक हार्कर र क्षेत्रीय सुरक्षा अधिकारी विल भनले संयुक्त रूपमा अमेरिकामा निर्मित ुफ्रीफ्लाई अल्टा एक्स जेन२ नामक व्यावसायिक कार्गो ड्रोन सशस्त्र प्रहरी बललाई हस्तान्तरण गरे ।
सशस्त्र प्रहरी बलले यो ड्रोनको प्रयोग कठिन भूबनोट र सडक पहुँच नभएका बाढी प्रभावित दुर्गम बस्तीहरूमा औषधि, खाद्यान्न लगायतका राहत सामग्री पुर्याउन गर्नेछ।
यसअघि अमेरिकी दूतावासको ‘एसेन्ट समिट’ कार्यक्रम अन्तर्गत सेभेन समिट ट्रेक्सले आमादाब्लम हिमालमा उक्त ड्रोनको सफल परीक्षण गरेको थियो।
सो परीक्षणका क्रममा तीव्र हावा र अत्यधिक प्रतिकूल हिमाली वातावरणका बीच ड्रोनले अक्सिजन सिलिन्डर र पर्वतारोहणका सामग्रीहरू उच्च शिविरहरूसम्म सफलतापूर्वक ओसारपसार गरेको थियो।
एभरेस्ट क्षेत्रमा गरिएको उक्त परीक्षणले नेपालको कठिन भूगोल र वातावरणमा अमेरिकी प्रविधिको व्यावहारिक प्रयोगलाई प्रमाणित गरेको छ।
यो कार्गो ड्रोन हस्तान्तरण बाढी र प्राकृतिक विपद्बाट प्रभावित नेपाली समुदाय र परिवारहरूका लागि अमेरिकाले प्रदान गर्दै आएको बृहत् सहयोगको एक हिस्सा हो।
अमेरिकाले मानवीयरूपमा खाद्यान्न तथा राहत सामग्रीका साथै लजिस्टिक, फोरेंसिक, कन्सुलर र अन्य प्राविधिक क्षेत्रमा पनि नेपाललाई निरन्तर सहयोग पुर्याउँदै आएको छ।
