काठमाडौं । रसुवाको भोटेकोशी नदीमा आएको बाढीपछि खोज, उद्धार, उपचार तथा राहत व्यवस्थापनमा वर्तमान सरकारले देखाएको तदारुकता र प्रभावकारी कदमको प्रभावित क्षेत्रका जनप्रतिनिधिहरूले उच्च प्रशंसा गरेका छन्।
सिंहदरबारस्थित प्रधानमन्त्री तथा मन्त्रिपरिषद्को कार्यालयमा आज प्रधानमन्त्री वालेन्द्र शाहको उपस्थितिमा आयोजित छलफल कार्यक्रममा जनप्रतिनिधिहरूले सरकारको कार्यशैलीप्रति सन्तोष व्यक्त गरेका हुन्।
उक्त छलफलमा बाढीबाट प्रत्यक्ष प्रभावित रसुवा, नुवाकोट, धादिङ, गोरखा र तनहुँ गरी १४ वटा स्थानीय तहका प्रमुखहरू, बागमती प्रदेशका मुख्यमन्त्री तथा सो क्षेत्रका प्रतिनिधिसभा सदस्यहरूको सहभागिता रहेको थियो।
छलफलका क्रममा जनप्रतिनिधिहरूले बाढी आउनासाथ संघ सरकारले स्थानीय तहहरूसँग समन्वय गरी तत्काल निर्णय लिएको र प्रभावित क्षेत्रमा मन्त्री तथा कर्मचारीहरूलाई खटाएर नियमित फलोअप गरिरहेको बताए।
प्रभावित क्षेत्रको वास्तविक स्थिति आफैँ बुझ्न जनप्रतिनिधिहरूलाई सिंहदरबारमै बोलाएर छलफल गर्नुलाई उहाँहरूले सकारात्मक पहलका रूपमा लिएका छन्।
भविष्यमा बाढी प्रभावित क्षेत्रका नागरिकहरूको दिगो पुनर्स्थापनाका लागि संघीय सरकारसँग निरन्तर सहकार्य, समन्वय र सहजीकरण गर्न आफूहरू तयार रहेको प्रतिबद्धता जनप्रतिनिधिहरूले व्यक्त गरे।
सोही क्रममा जनप्रतिनिधिहरूले विपद् व्यवस्थापन र राहत वितरणमा कुनै पनि किसिमको राजनीतिक वा अन्य भेदभाव हुनु नहुनेमा जोड दिए।
प्रभावित क्षेत्रमा विभिन्न गैरसरकारी संघसंस्थाहरू (एनजीओ–आइसीएनजीओ) ले घर बनाइदिने र बालबालिकालाई आश्रय दिने जस्ता आश्वासन दिन थालेको भन्दै उहाँहरूले संशय व्यक्त गरेका छन्।
यस्ता आश्वासनले स्थानीयमा भ्रम सिर्जना गर्न सक्ने भएकाले त्यस्ता गतिविधिमाथि कडा निगरानी राख्न उहाँहरूले सरकारको ध्यानाकर्षण गराए।
यस्तै, जनप्रतिनिधिहरूले बाढी प्रभावित क्षेत्रमा अविलम्ब सडक सञ्जाल पुनः जोड्न, बेपत्ता व्यक्तिहरूको खोजी कार्यलाई तीव्र पार्न, बाढीपछिको सम्भावित महामारी रोक्न स्वास्थ्य टोली खटाउन र होल्डिङ सेन्टरमा बसोबास गरिरहेका नागरिकहरूका लागि तत्काल अस्थायी आवासको प्रबन्ध मिलाउन माग गरेका छन्।
बाढी प्रभावित तटीय क्षेत्रमा वातावरणीय सन्तुलनका लागि हरियाली विकास गर्दै जोखिमयुक्त बस्तीहरूलाई नजिकैको सुरक्षित स्थानमा बिनाढिलाइ स्थानान्तरण गर्ने कार्यमा स्थानीय तहका तर्फबाट पूर्ण सहयोग र प्रतिबद्धता रहने जनप्रतिनिधिहरूले स्पष्ट पारेका छन्।
