वीरगन्ज । अख्तियार दुरुपयोग अनुसन्धान आयोगले धनुषाको धनौजी गाउँपालिकामा बाटो निर्माणका क्रममा कुनै काम नै नगरी झुट्टा कागजात बनाएर भ्रष्टाचार गरेको अभियोगमा तत्कालीन प्रमुख प्रशासकीय अधिकृत सावन कुमार चौधरीसहित १० जना र चार वटा निजी फर्म तथा कम्पनीहरूविरुद्ध विशेष अदालतमा आरोपपत्र दायर गरेको छ।
धनौजी गाउँपालिकाअन्तर्गत गौरदाहा देखि लखौरीसम्मको सडक निर्माण ठेक्काको विषयमा अख्तियारले गैरकानुनी लाभ तथा हानि पुऱ्याई भ्रष्टाचार गरेको ठहर गर्दै मुद्दा चलाएको हो। आयोगका अनुसार सडक निर्माणका लागि बोलपत्र आह्वान तथा बोलपत्र आशयको सूचना नियमानुसार प्रकाशित नै नगरी प्रक्रिया अघि बढाइएको थियो।
त्यसका साथै, स्थलगत रूपमा कुनै पनि निर्माण कार्य सम्पादन नभएको अवस्थामा समेत गैरकानुनी रूपमा झुट्टा प्राविधिक बिल, नापी किताब र कार्य सम्पन्न प्रतिवेदन तयार गरी तथा गराई रकम भुक्तानी लिने-दिने कार्य गरिएको अनुसन्धानबाट खुलेको छ।
उक्त प्रकरणमा धनुषाको धनौजी गाउँपालिकाका तत्कालीन प्रमुख प्रशासकीय अधिकृत सावन कुमार चौधरी, अन्य प्राविधिक तथा कर्मचारीहरू गरी १० जना व्यक्तिहरूलाई प्रतिवादी बनाइएको छ। यसका अलावा भ्रष्टाचारमा संलग्न रहेको भन्दै अमृत मिडिया प्राइभेट लिमिटेड, जनकपुर टुडे मिडिया ग्रुप प्रा.लि., साइन कन्ट्रक्सन धनुषा र एसके वाइ इन्जिनियरिङ एण्ड ट्रेडिङ प्रा.लि. लाई समेत प्रतिवादी कायम गरिएको छ।
आयोगले प्रतिवादीहरूविरुद्ध भ्रष्टाचार निवारण ऐन, २०५९ को दफा ८ को उपदफा (१० को देहाय (ङ_ बमोजिमको कसुरमा फरक(फरक बिगो रकम कायम गरी कैद सजाय, बिगोबमोजिम जरिवाना र बिगो असुल उपर गर्न मागदाबी गरेको छ। साथै, सोही ऐनको दफा ९ र दफा १९ को उपदफा (२) बमोजिमसमेत थप कैद र जरिवाना सजाय हुनुपर्ने मागसहित आरोपपत्र दायर गरिएको छ।
