काठमाडौं। सरकारले भोटेकोशी बाढीपीडित व्यवसायीहरूका लागि ’विशेष ‘व्यवसाय पुनरुत्थान प्याकेज’ घोषणा गर्दै आयकर पूर्ण छुट र कर बुझाउने म्याद थपसहितका ठूला राहत सुविधाहरू ल्याएको छ।
अर्थ मन्त्रालयको प्रस्तावमा आज बसेको मन्त्रिपरिषद् बैठकले बाढीबाट प्रत्यक्ष प्रभावित पूर्वानुमानित आय विवरण पेश गर्ने व्यवसायीहरूलाई आय वर्ष २०८२/८३ को आयकर शतप्रतिशत छुट दिने निर्णय गरेको हो।
यसैगरी, बाढीका कारण प्रभावित करदाताहरूले मूल्य अभिवृद्धि कर, आयकर, अन्तःशुल्क तथा आर्थिक ऐन बमोजिम २०८३ भदौ र असोज महिनाभित्र बुझाउनुपर्ने कर विवरण तथा कर रकम २०८३ कात्तिक २५ गतेसम्म बुझाउन पाउने गरी म्याद थप गरिएको छ।
सरकारी राहत प्याकेज अन्तर्गत बाढीबाट पूर्ण रूपमा क्षति भएको व्यावसायिक सम्पत्तिको मूल्यलाई कर प्रयोजनका लागि एकमुष्ठ खर्चकट्टी गर्न पाइनेछ भने आंशिक क्षति भएका सम्पत्तिको मर्मत सुधार खर्चमा आय वर्ष २०८३र८४ को करयोग्य आय निर्धारण गर्दा तोकिएको सीमा लागू नहुने व्यवस्था गरिएको छ।
साथै, क्षति भएको व्यावसायिक सम्पत्तिमा तिरेको मूल्य अभिवृद्धि करको दाबी समायोजन प्रक्रियालाई समेत सरलीकृत बनाइएको छ।
