वीरगञ्ज । पर्सा राष्ट्रिय निकुञ्जको चारभैया पोस्टबाट करिब २ किलोमिटर उत्तर भाठामेला जाने बाटोमा मंगलबार बिहान मृत अवस्थामा फेला परेको युवकको ट्याक्टरले किचेर मृत्यु भएको पुष्टि भएको छ ।
पर्साको पटेर्वा सुगौली गाउँपालिका–१ स्थित राष्ट्रिय निकुञ्जको चारभैया पोष्टमा मंगलबार बिहान करिब ८ः३० बजेको समयमा अन्दाजी २५/२६ वर्ष जस्तो देखिने पुरुषको शव बेवारिसे अवस्थामा भेटिएको थियो ।
शव देखेपछि स्थानीय र निकुञ्ज सुरक्षामा खटिएका नेपाली सेनाले प्रहरीलाई खबर गरेका थिए।
घटनाको जानकारी पाउनासाथ प्रहरी चौकी रंगपुर टाडी पर्साबाट प्रहरी सहायक निरीक्षक हर्क बहादुर श्रेष्ठको कमाण्डमा प्रहरी टोली खटिएको थियो।
घटनाको थप अनुसन्धानका लागि इलाका प्रहरी कार्यालय पटेर्वा सुगौलीबाट प्रहरी निरीक्षक समुन्नत अधिकारीको कमाण्डमा बरिष्ठ प्रहरी अनुसन्धान अधिकृतसहित ५ जनाको विशेष टोली अनुसन्धानका लागि घटनास्थल पुगेको थियो।
शवको घटनास्थल मुचुल्का तथा प्रारम्भिक कानुनी प्रक्रिया पुरा गरी अपराह्न ३ः०० बजे पोष्टमार्टमका लागि वीरगञ्जस्थित नारायणी अस्पताल पठाइएको जिल्ला प्रहरी कार्यालय पर्साका प्रवक्ता प्रहरी नायव उपरीक्षक चक्र बहादुर मल्लले जानकारी दिए ।
सुरुमा नाम, थर र ठेगाना नखुलेका मृतक युवकको पछि आफन्तबाट पहिचान खुलेको छ। मृतकका बुवा अजय रामले अस्पताल पुगेर शवको पहिचान गरेपछि उनी बारा जिल्ला बिश्रामपुर गाउँपालिका–५ ईटियाही बस्ने १७ वर्षीय आकाश राम रहेको पुष्टि भएको छ।
घटनाबारे थप अनुसन्धान भइरहेको र पोष्टमार्टम रिपोर्ट आएपछि मात्र मृत्युको वास्तविक कारण खुल्ने प्रहरीले जनाएको छ। रामलाई ठक्कर दिने ट्याक्टर र चालकको पनि खोजी भईरहेको प्रहरी नायव उपरीक्षक मल्लले जानकारी दिए ।
