वीरगन्ज । नेपाल भारत मैत्री संघले वीरगन्जमा परवानीपुर स्थित बाल गृहमा सहयोग गर्नुका साथै वृक्षरोपण पनि गरेको छ ।
भारतको ८० औं स्वतन्त्रता दिवसको अवसर पारेर संघले वीरगन्ज महानगरपालिका वडा नम्बर २१ परवानीपुर स्थित आवर संसार बालगृहका बालबालिकाहरुलाई आवश्यक सहयोग गर्नुका साथै वृक्षरोपण पनि गरेको हो ।
संघका अध्यक्ष रजत सचदेवाको अध्यक्षतामा भएको कार्यक्रमका प्रमुख अतिथि वीरगन्ज स्थित भारतीय महावाणिज्यदूतावासका महावाणिज्यदूत देवी सहाय मीणा र संघका अध्यक्ष रजत सचदेवा सहित पदाधिकारीले आवर संसारका अध्यक्ष मूकेश साहलाई बालबालिकाहरुका लागि आवश्यक सामग्री हस्तान्तरण गरेका थिए ।
संघले बालबालिकाहरुका लागि आवश्यक झुल, शैक्षिक तथा खेलकुद सामग्री वितरण गरेको संघका निवर्तमान अध्यक्ष निर्मल खत्री सिंधीले बताए ।
कार्यक्रममा बोल्दै भारतीय महावाणिज्यदूत देवीसहाय मीणाले नेपाल र भारतबीचको सम्बन्ध त्रेतायुगदेखिको सम्बन्ध रहेको र अहिले पनि त्यो कायम नै रहेको बताए ।
उनले नेपाल र नेपाली नागरिकका लागि भारत सरकारले विभिन्न क्षेत्रमा सहयोग गर्दै आएको जानकारी गराउदै भारतको स्वतन्त्राका लागि नेपालीले खेलेको भूमिकाको पनि स्मरण गरे ।
उनले भारतीय स्वतन्त्रताका लागि नेपालीले पनि महत्वपूर्ण योगदान गरेको स्मरण गर्दै नेपाल र भारतबीचको सम्बन्ध र सहयोग निरन्त रहीरहने बताए ।
कार्यक्रममा कार्यक्रममा महावाणिज्यदूतावासका मनिष दास, वडा नम्बर २१ का वडा अध्यक्ष राधाकृष्ण रौनियार, नेपाल भारत मैत्री संघका पदाधिकारी तथा आवस संसारका शिक्षक तथा बालबालिकाहरुको उपस्थिति रहेको थियो ।
सहयोग हस्तान्तरणपछि प्रमुख अतिथि देवी सहाय मीण सहित सहभागीहरुले आवर संसारको भवन परिसरमा विभिन्न प्रजातिका विरुवा पनि रोपेका छन् ।
