वीरगन्ज जिल्ला प्रहरी कार्यालय पर्साका प्रमुख प्रहरी उपरीक्षक पवन भट्टराईले सामाजिक कुरीति, बालविवाह तथा घरेलु हिंसा न्यूनीकरणका लागि समुदायसँग प्रत्यक्ष सहकार्य गरेर अघि बढ्ने प्रतिबद्धता जनाएका छन्।
करिब १६ दिन अघि पर्साको प्रहरी प्रमुखका रूपमा जिम्मेवारी सम्हालेका एसपी भट्टराईले स्थानीय पत्रकारहरूसँग शुक्रबार भएको परिचयात्मक तथा अन्तरक्रिया कार्यक्रममा सो कुरा बताएका हुन्।
कार्यक्रममा बोल्दै एसपी भट्टराईले प्रहरी २४ सै घण्टा जनताको सेवामा समर्पित रहेको स्पष्ट पारे। नागरिक र प्रहरीको कामकारबाहीबीच देखिने असन्तुष्टि तथा अन्तरलाई समाधान गर्न प्रहरीको एकल प्रयास मात्र पर्याप्त नहुने उल्लेख गर्दै उनले भने, ‘शान्ति सुरक्षा कायम गर्न र सामाजिक विकृति हटाउन सञ्चारक्षेत्र तथा सञ्चारकर्मीहरूको रचनात्मक सुझाव र सहयोग अपरिहार्य छ।’
सीमाक्षेत्रमा हुने चोरी–तस्करी नियन्त्रणका लागि प्रहरी पूर्ण रूपमा प्रयासरत रहने र कुनै पनि किसिमका अपराध नियन्त्रणका लागि समयमै प्रहरीलाई सूचना दिएर सहयोग गर्न उनले सम्पूर्ण पर्सावासीसँग आग्रहसमेत गरे।
वीरगन्जमा धार्मिक द्वन्द्वकै बेलामा पर्साको सुरक्षा कमाण्ड सम्हाल्न आएका प्रहरी उपरीक्षक भट्टराईलाई पर्सेली सञ्चारकर्मीहरुले सरुवा भएर गएका प्रहरी उपरीक्षक सुदीपराज पाठकको जस्तो व्यवहार नगर्न पनि सुझाव दिएका थिए ।
जिल्ला प्रहरी कार्यालय पर्सासँग पर्साका सबै नागरिकले समान व्यवहारको अपेक्षा गरेका र सुरक्षाको समेत प्रत्याभूति खोजेको बताउदै पर्साका सञ्चारकर्मीहरुले त्यसको वातावरण बनाउन पनि आग्रह गरे ।
राज्य, सरकार नै अहिले सञ्चारक्षेत्रमाथि आक्रामक रहेको अवस्थामा पर्सामा पनि प्रहरी र सञ्चारकर्मीहरुबीचको सबन्धनमा चिसोपन आउन नदिन दुवैपक्षले सकारात्मक सोच र सुमधुर सम्बन्धका साथ व्यावसायिक आचरण प्रदर्शन गर्नुपर्ने बताएका थिए ।
प्रहरी उपरीक्षक भट्टराईले शान्ति सुरक्षा कायम राख्ने क्रममा नागरिकको अधिकार, स्वतन्त्रता र मानवअधिकारका विषयलाई पनि ख्याल गर्दै शुन्य सहनशिलतामा राज्यको कानून कार्यान्वयनमा प्रहरी प्रतिबद्ध रहेको बताए ।
