वीरगन्ज । जिल्ला प्रशासन कार्यालय पर्साले सरकारी, निजी तथा सहकारी अस्पतालहरूले लक्षित वर्गका विपन्न नागरिकलाई नियम अनुसार दिनुपर्ने निःशुल्क उपचार तथा छुट सुविधा कार्यविधि अनुसार उपलब्ध गराउन निर्देशन दिएको छ ।
अस्पतालहरुमा नियम अनुसार दिनुपर्ने सुविधा तथा छुटहरु नदिएको गुनासो बढेपछि प्रशासन कार्यालयले मंगलबार एक सूचना जारी गर्दै जिल्लाका सम्पूर्ण स्वास्थ्य संस्थाहरूलाई कार्यविधि अनुसारको छुट र सहुलियत तत्काल व्यवस्था गर्न निर्देशन दिएको हो।
गृह मन्त्रालयको शान्ति सुरक्षा तथा अपराध नियन्त्रण शाखाको आदेशलाई उदृत गर्दै प्रशासकीय अधिकृत रेखा कुमारीद्वारा हस्ताक्षरित पत्रमा आर्थिक रूपमा विपन्न, असहाय र बेवारिसे भनी स्थानीय तहले सिफारिस गरेका बिरामीहरूलाई (लक्षित वर्ग निःशुल्क उपचार पोर्टल सञ्चालन तथा व्यवस्थापन) कार्यविधि, २०८३ु बमोजिम सहुलियत उपलब्ध गराउन भनिएको छ।
नियम उल्लंघन गर्ने र सहुलियत नदिने अस्पतालहरूलाई कानुन बमोजिम कडा कारबाही गरिने चेतावनी समेत प्रशासनले दिएको छ। यसका साथै, अस्पतालहरूले नियम पालना गरे/नगरेको नियमित अनुगमन गर्न र कारबाही प्रक्रिया अघि बढाउन स्वास्थ्य कार्यालय पर्सा तथा जिल्लाका सबै स्थानीय तहहरूलाई समेत बोधार्थ पठाइएको छ।
स्थानीय तहहरूलाई आफ्ना मातहतका सबै वडा कार्यालयहरूमा यसबारे जानकारी गराउन र कडा निगरानी राख्न निर्देशन दिइएको छ।
