वीरगन्ज । सशस्त्र प्रहरी बल नेपालले पर्साको ठोरीमा ठुलो मात्रामा प्रतिबन्धित लागुऔषध गाँजा बरामद गरेको छ ।
विशेष सूचनाका आधारमा सशस्त्र प्रहरी बल नेपाल नं.१३ गण हेडक्वार्टर पर्सा मातहतको सीमा सुरक्षा गुल्म हेडक्वार्टर भीखमपुरबाट खटिएको टोलीले ठोरी गाउँपालिका वडा नं.४ मिलचोकस्थित एक घरबाट १५८ किलोग्राम गाँजा बरामद गरेको हो ।
सीमा सुरक्षा गुल्म भीखमपुरका गुल्मपति सशस्त्र प्रहरी नायब उपरीक्षक सुमन बोगटीको कमाण्डमा खटिएको ५४ जनाको विशेष टोलीले स्थानीय गम्भीर श्रेष्ठको जस्ताले छाएको पक्की घरलाई घेराउ गरी खानतलासी गरेको थियो ।
स्थानीय जनप्रतिनिधि र नेपाल प्रहरीको रोहबरमा गरिएको उक्त खानतलासीमा प्लास्टिक र बोरामा ११ वटा पोका बनाएर लुकाइराखेको अवस्थामा उक्त परिमाणको गाँजा फेला परेको सशस्त्र प्रहरी पर्साका सूचना अधिकारी सशस्त्र प्रहरी नायव उपरीक्षक मोहनराज निरौलाले जानकारी दिए ।
बरामद गरिएको गाँजालाई नियन्त्रणमा लिएर आवश्यक कानुनी कारबाहीका लागि नेपाल प्रहरीलाई बुझाउने प्रक्रिया अगाडि बढाइएको छ ।
छापा मार्ने क्रममा घरधनी गम्भीर श्रेष्ठ फरार रहेकाले फेला नपरेको प्रहरीले बताएको छ । उनका दुई नाबालक बच्चा रहेका कारण उनकी श्रीमती अस्मिता तामाङ श्रेष्ठलाई भने ठोरी गाउँपालिकाका अध्यक्ष लालबहादुर श्रेष्ठको रोहबरमा छाडिएको सशस्त्र प्रहरीले जानकारी दिएको छ ।
