वीरगंज । वीरगंज महानगरपालिका वडा नं.१६ स्थित भन्सार मेनगेटबाट सशस्त्र प्रहरीले लागूऔषधसहित दुई जनालाई नियन्त्रणमा लिएको छ ।
शुक्रबार साँझ ५ बजेको समयमा भारतबाट नेपालतर्फ आउँदै गरेको यात्रीवाहक अटोलाई विशेष जाँच गर्ने क्रममा उनीहरू पक्राउ परेका हुन् ।
पक्राउ पर्नेहरूमा मकवानपुरको हेटौँडा उपमहानगरपालिका वडा नं. ११ सिमलटार निवासी २० वर्षीय सागर घिमिरे र २३ वर्षीया पुजा जिम्बा रहेका छन् । शंकास्पद अवस्थामा रहेका उनीहरूलाई चेकजाँच गर्दा साथबाट ५ ग्राम ब्राउन सुगर र ०.३४ मिलिग्राम सेतो हिरोइन जस्तो देखिने पदार्थ बरामद भएको सशस्त्र प्रहरीले जनाएको छ ।
सशस्त्र प्रहरी बल नेपाल सीमा सुरक्षा गुल्म वीरगंजबाट प्रहरी सहायक निरीक्षक नितेश कुमार शाह कानुको कमाण्डमा खटिएको ९ जनाको टोली सहितको जाँच टोलीमा ‘दृष्टि’ नाम गरेको ‘ड्रग्स डिटेक्सन’ ट्रेडको तालिमप्राप्त पोथी कुकुर समेत सहयोगमा उनीहरुलाई पक्राउ गरेको हो ।
पक्राउ परेका दुवै जनालाई बरामद लागूऔषधसहित आवश्यक कानूनी कारवाहीका लागि वडा प्रहरी कार्यालय बिर्तामा बुझाइएको सशस्त्र प्रहरी बल नेपाल नम्बर १३ गण हेडक्वाटर पर्साका सूचना अधिकारी सशस्त्र प्रहरी नायव उपरीक्षक मोहनराज निरौलाले जानकारी दिए।
सीमा क्षेत्रमा बढ्दो लागूऔषध ओसारपसार नियन्त्रण गर्न सशस्त्र प्रहरीले कुकुरसहितको विशेष टोली परिचालन गरी नियमित जाँचलाई तीव्रता दिँदै आएको छ ।
