काठमाडौँ । सशस्त्र प्रहरी बल नेपालका नवनियुक्त महानिरीक्षक (आईजीपी) नारायणदत्त पौडेलले दर्ज्यानी चिह्न (फुली) लगाउनुभएको छ । सोमबार गृह मन्त्रालयमा आयोजित एक विशेष कार्यक्रमका बीच गृह सचिव राजकुमार श्रेष्ठले उहाँलाई आईजीपीको दर्ज्यानी चिह्न प्रदान गर्नुभएको हो ।
मन्त्रिपरिषद्को सोमबार बसेको बैठकले अतिरिक्त महानिरीक्षक (एआईजी) पौडेललाई सशस्त्र प्रहरी बलको सर्वोच्च पद महानिरीक्षकमा बढुवा गर्ने निर्णय गरेको थियो ।
यसअघिका महानिरीक्षक राजु अर्याल १८ वैशाखमा अनिवार्य अवकाशमा गएपछि रिक्त रहेको पदमा पौडेललाई नियुक्त गरिएको हो । दर्ज्यानी चिह्न ग्रहण गरेसँगै आईजीपी पौडेलले सशस्त्र प्रहरी बलको कमाण्ड औपचारिक रूपमा सम्हाल्नुभएको छ ।
दर्ज्यानी चिह्न सुशोभन कार्यक्रममा गृह मन्त्रालयका उच्च पदस्थ अधिकारीहरू र सशस्त्र प्रहरीका वरिष्ठ अधिकृतहरूको उपस्थिति रहेको थियो ।
