काठमाडौँ | अमेरिका, इजरायल र इरानबिच चर्किएको द्वन्द्वका कारण पश्चिम एसियाका विभिन्न मुलुकमा प्रभावित बनेका नेपाली नागरिकलाई सरकारले उद्धार गरी स्वदेश फर्काउने कार्यलाई तीव्रता दिएको छ। परराष्ट्रमन्त्री शिशिर खनालको विशेष पहल र सक्रियतामा द्वन्द्वग्रस्त क्षेत्रमा अलपत्र परेका नेपालीलाई सुरक्षित रूपमा स्वदेश ल्याउन थालिएको हो।
परराष्ट्र मन्त्रालयका अनुसार, चैत १९ गतेदेखि हालसम्म कुल १,०५८ जना नेपाली नागरिकलाई सुरक्षित रूपमा स्वदेश फर्काइएको छ। यस उद्धार कार्यमा नेपाली ध्वजावाहक नेपाल एयरलाइन्सले मुख्य भूमिका निर्वाह गर्दै ७०९ जनालाई ल्याएको छ भने अन्य २५१ जना कुवेत एयरमार्फत स्वदेश फर्किएका छन्।
सरकारको उच्च प्राथमिकतामा उद्धार कार्य
मन्त्रालयका प्रवक्ता लोकबहादुर क्षेत्रीले पश्चिम एसियामा समस्यामा परेका नेपाली नागरिकलाई सम्पर्कमा आउनासाथ प्राथमिकताका साथ उद्धार प्रक्रिया अघि बढाइएको जानकारी दिनुभयो। मन्त्रालयले यसका लागि छुट्टै ‘आपत्कालीन कार्य सञ्चालन केन्द्र’ मार्फत प्रभावित क्षेत्रमा रहेका नेपालीको अवस्थाबारे निरन्तर अनुगमन गरिरहेको छ।
त्यसैगरी, कन्सुलर सेवा विभागले अनलाइन पोर्टल सञ्चालन गरी विश्वभर रहेका नेपालीहरूको लगत सङ्कलन कार्यलाई थप व्यवस्थित बनाएको छ। मन्त्रालयले द्वन्द्व प्रभावित क्षेत्रमा रहेका सम्पूर्ण नेपालीहरूलाई सुरक्षित रहन र आवश्यक सहयोगका लागि तत्काल दूतावास वा मन्त्रालयको सम्पर्कमा आउन आग्रह गरेको छ।
