वीरगञ्ज । सशस्त्र प्रहरी बल नेपाल सीमा सुरक्षा गुल्म हेडक्वाटर पर्साको टोलीले वीरगञ्ज भन्सार मेनगेटबाट स्रोत नखुलेको ९ लाख नेपाली रुपैयाँसहित एक जनालाई नियन्त्रणमा लिएको छ।
विशेष सूचनाको आधारमा खटिएको सप्रसनि मोहम्मद मुस्ताक अलीको कमाण्डमा रहेको ७ जनाको टोलीले बिहीबार दिउँसो अन्दाजी १५:३० बजे भारतबाट नेपालतर्फ आउँदै गरेको ना २ प ९५८७ नम्बरको हिरो होण्डा मोटरसाइकललाई चेकजाँच गरेको थियो।
ADVERTISEMENT
सो क्रममा वीरगञ्ज महानगरपालिका–८, गहवा बस्ने ४४ वर्षीय अनिल कुमार शाहले मोटरसाइकलको सिट कभरमुनि प्लास्टिकमा लुकाई ल्याउँदै गरेको अवस्थामा १,००० दरका ९०० थान नोट बरामद गरिएको हो।
पक्राउ परेका शाहलाई बरामद नगद र मोटरसाइकलसहित आवश्यक कारबाहीका लागि वीरगञ्ज भन्सार कार्यालय पर्सामा बुझाइएको सशस्त्र प्रहरीले जनाएको छ।
