काठमाडौं । देशभर आज बिहानैदेखि प्रतिनिधिसभा सदस्य निर्वाचनका लागि मतदान जारी रहेको छ । कोशी प्रदेशसहित मुलुकका विभिन्न स्थानमा मतदाताहरू बिहानैदेखि मतदान केन्द्रमा पुगेर उत्साहका साथ मतदान गरिरहेका छन् ।
पछिल्लो तथ्याङ्कअनुसार कोशी प्रदेशका तीन प्रमुख जिल्लामा मतदानको अवस्था फरक–फरक देखिएको छ ।
झापामा हालसम्म २८ प्रतिशतभन्दा बढी मत खसेको छ । प्रमुख जिल्ला अधिकारी शिवराम गेलालका अनुसार जिल्लाका सबै मतदान केन्द्रमा शान्तिपूर्ण रूपमा मतदान भइरहेको छ ।
सुनसरीमा पनि मतदाताको उत्साहजनक उपस्थिति देखिएको छ । प्रमुख जिल्ला अधिकारी बासुदेव घिमिरेका अनुसार जिल्लामा हालसम्म २० प्रतिशतभन्दा बढी मतदान भइसकेको छ ।
मोरङमा बिहानको समयमा १५ प्रतिशत मत खसेको जिल्ला निर्वाचन कार्यालयले जनाएको छ । मतदान केन्द्रहरूमा मतदाताको क्रमशः भीड बढ्दै गएको बताइएको छ ।
झापा, मोरङ र सुनसरीका सबै मतदान केन्द्रमा सुरक्षा व्यवस्था कडा पारिएको छ । केही स्थानमा सामान्य विवादका समाचार आए पनि समग्रमा मतदान प्रक्रिया शान्तिपूर्ण रहेको प्रशासनले जनाएको छ ।
निर्वाचन आयोगले अपराह्न ५ बजेसम्म मतदानको समय तोकेकाले दिउँसोसम्म मतदान प्रतिशत अझ बढ्ने अनुमान गरिएको छ ।
