काठमाडौं । आगामी फागुन २१ गते हुने प्रतिनिधिसभा सदस्य निर्वाचनलाई लक्षित गरी निर्वाचन आयोगले विशेष स्वास्थ्य सुरक्षा व्यवस्था मिलाउन निर्देशन दिएको छ। आयोगले मतदानको दिन सबै मतदान केन्द्रमा प्राथमिक स्वास्थ्य उपचार सेवा उपलब्ध गराउन सरकार र सरोकारवाला निकायहरूको ध्यानाकर्षण गराएको हो।
आयोगका सहसचिव एवं प्रवक्ता नारायणप्रसाद भट्टराईद्वारा जारी विज्ञप्तिअनुसार, निर्वाचनमा खटिने कर्मचारी, सुरक्षाकर्मी तथा मतदान गर्न आउने अपाङ्गता भएका व्यक्ति, अशक्त र ज्येष्ठ नागरिकलाई भैपरी आउने स्वास्थ्य समस्या समाधानका लागि यस्तो व्यवस्था मिलाउन भनिएको हो।
यस पटकको निर्वाचनका लागि देशभर १० हजार ९६७ मतदान स्थल र २३ हजार २५५ मतदान केन्द्र (अस्थायी समेत) तोकिएका छन्। आयोगले सबै मतदान स्थलमा आकस्मिक स्वास्थ्य सेवा पुर्याउन संघीय मामिला तथा सामान्य प्रशासन मन्त्रालयमार्फत स्थानीय तहहरूलाई समन्वय गर्न पत्राचार गरिसकेको छ।
विज्ञप्तिमा उल्लेख भएअनुसार, देशभरका अस्पताल तथा स्वास्थ्य संस्थाहरूमा चिकित्सक, स्वास्थ्यकर्मी र औषधिलाई तयारी अवस्थामा राख्न स्वास्थ्य तथा जनसंख्या मन्त्रालयलाई निर्देशन दिइएको छ।
“मतदानका दिन कुनै पनि आकस्मिक स्थिति उत्पन्न भएमा तत्काल उपचार सेवा उपलब्ध गराउन सक्ने गरी देशभरको स्वास्थ्य संयन्त्रलाई सक्रिय बनाउन अनुरोध गरिएको छ,” प्रवक्ता भट्टराईले जानकारी दिए।
निर्वाचनलाई स्वच्छ र व्यवस्थित बनाउन आयोगले मतदानको दिनभन्दा अघि र पछि गरी कुल तीन दिन सार्वजनिक बिदाका लागि गरेको सिफारिस सरकारले स्वीकृत गरिसकेको छ।
यस्तै, मतदान प्रक्रिया सञ्चालनका लागि फागुन १९ गतेदेखि २१ गतेसम्म शिक्षण संस्था, स्वास्थ्य चौकी र वडा कार्यालयका भवनहरू प्रयोग गरिनेछ। यी सरकारी संरचना र त्यहाँ रहेका भौतिक सम्पत्ति उपयोग गर्न गृह मन्त्रालयमार्फत सम्बन्धित निकायहरूमा पत्राचार भइसकेको छ।
निर्वाचन आयोगले आगामी फागुन २१ गतेको निर्वाचनलाई मतदाताको सार्थक सहभागितासहित भयरहित वातावरणमा सम्पन्न गर्न सबै क्षेत्रबाट सहयोगको अपेक्षा गरेको छ।
