दाङ । दाङको तुलसीपुर उपमहानगरपालिका–५ स्थित बिरेन्द्र चोकमा नेकपा (एमाले) को चुनाव चिन्ह अंकित झण्डा जलाएको घटनामा संलग्न रहेको आरोपमा प्रहरीले थप दुई जनालाई नियन्त्रणमा लिएको छ। बुधबार राति करिब ९ः३० बजेको समयमा भएको उक्त घटनाको निरन्तर अनुसन्धानका क्रममा प्रहरीले उनीहरूलाई पक्राउ गरेको हो।
पक्राउ पर्नेहरूमा तुलसीपुर उपमहानगरपालिका–४ हलवार निवासी ३० वर्षीय रमेश राना मगर र वडा नम्बर ६ गाइडर निवासी २४ वर्षीय विक्रम परियार रहेका छन्। यसअघि पक्राउ परिसकेका बुद्धि बहादुर बस्नेतसहित हालसम्म यस घटनामा संलग्न भएको आरोपमा तीन जना प्रहरीको नियन्त्रणमा पुगेका छन्।
प्रहरीले पक्राउ परेका तीनै जनामाथि आवश्यक अनुसन्धान अगाडि बढाएको छ। साथै उक्त घटनामा संलग्न हुन सक्ने अन्य व्यक्तिहरूको पनि खोजी कार्य तीव्र पारिएको प्रहरीले जनाएको छ।
ADVERTISEMENT
