धनगढी । आगामी प्रतिनिधिसभा निर्वाचनको सरगर्मी बढ्दै जाँदा राष्ट्रिय स्वतन्त्र पार्टी (रास्वपा) ले आज सुदूरपश्चिमको मुकाम धनगढीमा बृहत् ‘परिवर्तन उद्घोष सभा’ आयोजना गर्दैछ। धनगढी उपमहानगरपालिकास्थित पशुपति टोल (महोत्सव स्थल) मा बिहान ११ बजेदेखि सुरु हुने यस सभालाई रास्वपाका सभापति रवि लामिछाने र वरिष्ठ नेता बालेन शाहले सम्बोधन गर्ने कार्यक्रम छ।
फागुन २१ गते हुने प्रतिनिधिसभा निर्वाचनका लागि रास्वपाले देशव्यापी अभियानलाई तीव्रता दिएको छ। यसै सिलसिलामा पार्टीका दुई मुख्य अनुहारहरू चुनावी अभियानको दौरान धनगढी पुग्न लागेका हुन्।
चितवन निर्वाचन क्षेत्र नं. २ का उम्मेदवार रहेका लामिछाने कञ्चनपुरको कार्यक्रम सकेर धनगढी आउँदैछन्। साथै झापा निर्वाचन क्षेत्र नं. ५ बाट उम्मेदवार रहेका वरिष्ठ नेता शाह काठमाडौँबाट सिधै धनगढी पुग्नेछन्।
यसअघि रास्वपाले माघ ५ गते मधेश प्रदेशको जनकपुरधाममा भव्य ‘परिवर्तन उद्घोष सभा’ सम्पन्न गरिसकेको छ। जनकपुरको सफलतापछि पार्टीले सुदूरपश्चिमलाई लक्षित गरी धनगढीमा यो सभा आयोजना गरेको हो।
“यो केवल एउटा चुनावी सभा मात्र नभई सुदूरपश्चिमबाट परिवर्तनको बिगुल फुक्ने अभियान हो,” रास्वपाका स्थानीय नेताहरूले बताएका छन्।
निर्वाचनको मिति नजिकिँदै गर्दा वैकल्पिक राजनीतिक शक्तिका रूपमा हेरिएको रास्वपाको यो सभालाई राजनीतिक वृत्तमा महत्त्वका साथ हेरिएको छ।
