निजी तथा आवासीय विद्यालय अर्गनाइजेशन नेपाल (प्याब्सन) जिल्ला पर्साले एसइईको तयारीका लागि प्रि–एसइई (प्रिबोर्ड) परीक्षा फागुन ४ गतेदेखि सञ्चालन गर्ने भएको छ। परीक्षा फागुन १२ गतेसम्म चल्नेछ।
जिल्लाका ३९ वटा निजी तथा आवासीय विद्यालयका कूल १ हजार ३७३ विद्यार्थी परीक्षामा सहभागी हुनेछन्। सहभागीमध्ये ८२२ छात्र र ५५१ छात्रा रहेका छन्। परीक्षा बिहान ७ बजेदेखि १० बजेसम्म सञ्चालन गरिने जनाइएको छ।
परीक्षाका लागि चार वटा केन्द्र तोकिएका छन्। Sunlight Secondary School, Golden Future Secondary School, Miniland Secondary School र SR Galaxy Academy लाई केन्द्र निर्धारण गरिएको प्याब्सन पर्साले जनाएको छ।
देशका अधिकांश जिल्लामा गत माघ २२ गते नै प्रि–एसइई परीक्षा सम्पन्न भए पनि पर्सामा भने हैजाको संक्रमणका कारण विद्यालयमा बिदा हुन पुगेको थियो। साथै जाडो तथा गर्मी बिदाले पठनपाठन प्रभावित भई पाठ्यक्रम पूरा हुन नसकेपछि फागुन ४ गतेदेखि परीक्षा सञ्चालन गर्ने निर्णय गरिएको हो।
परीक्षा संयोजक तथा जिल्ला कार्यसमिति सदस्य उमेश साहले एसइईअघि अभ्यास परीक्षाले विद्यार्थीलाई अन्तिम परीक्षाका लागि तयार बनाउन सहयोग पुग्ने बताए। “यसले विद्यार्थीको वास्तविक तयारी स्तर मापन गर्न र कमजोरी सुधार्न अवसर प्रदान गर्छ,” उनले भने।
प्याब्सन पर्साका सचिव अशोक संग्रौलाले परीक्षा निष्पक्ष, मर्यादित र व्यवस्थित रूपमा सञ्चालन गरिने जानकारी दिए। “सबै विद्यालयसँग समन्वय गरी आवश्यक तयारी पूरा गरिएको छ,” उनले बताए।
प्याब्सन पर्साका अध्यक्ष सरोज प्रसाद चौधरीले प्रि–एसइई परीक्षा एसइईको तयारीलाई प्रभावकारी बनाउने माध्यम भएको उल्लेख गरे। उनले विद्यार्थी, शिक्षक र अभिभावकलाई सहकार्य गरी सफलतापूर्वक परीक्षा सम्पन्न गराउन सहयोग गर्न अनुरोध गरे । उनले अभिभावक र विद्यालय प्रशासनलाई पनि विद्यार्थीको मनोबल उच्च राख्न आग्रह गरे।
