वीरगन्ज । पर्सामा राष्ट्रिय स्वतन्त्र पार्टी (रास्वपा) प्रति सर्वसाधारणको आकर्षण ह्वात्तै बढेको छ। पार्टीका वरिष्ठ नेता बालेन शाहको वीरगन्जमा सम्पन्न भव्य रोड-शो पछि स्थानीयहरु स्वस्फूर्त रूपमा रास्वपा खोज्दै पार्टी प्रवेश गर्न थालेका हुन्।
यसै क्रममा पर्सा निर्वाचन क्षेत्र नम्बर १ अन्तर्गत शुक्रबार र शनिबार भएका छुट्टाछुट्टै कार्यक्रममा ५०० भन्दा बढी पेशाकर्मी, सामाजिक अभियन्ता तथा स्थानीय नेताहरु रास्वपामा प्रवेश गरेका छन्।
परवानीपुरमा शुक्रबार ढिलो गरी आयोजित कार्यक्रममा स्थानीय अभियन्ता प्रदीप साहको नेतृत्वमा ठूलो संख्यामा टोली रास्वपामा समाहित भएको हो। त्यस्तै, शनिबार बिहान भिस्वामा आयोजित अर्को कार्यक्रममा कृष्ण श्रेष्ठ, सन्देश श्रेष्ठ र राजेश श्रेष्ठको नेतृत्वमा विभिन्न क्षेत्रका विशिष्ट व्यक्तित्वहरुले रास्वपाको सदस्यता लिएका छन्।
नवप्रवेशीहरुलाई रास्वपा पर्साका जिल्ला सभापति एवं पर्सा क्षेत्र नं.१ का प्रतिनिधि सभा सदस्य उम्मेदवार हरि पन्तले टीका र खादा लगाएर पार्टीमा स्वागत गरे सो अवसरमा बोल्दै सभापति पन्तले पुराना दलहरुको विकल्पमा जनताले रास्वपालाई रोजेको बताए । ‘संकटको बेला हेलिकप्टरमा झुण्डिएर भाग्ने र जनतालाई दुःख दिने पुराना दल र तिनका उम्मेदवारलाई यसपटकको निर्वाचनमा बहिष्कार गर्न जरुरी छ’ उनले भने ।
पार्टी प्रवेश कार्यक्रमसँगै उम्मेदवार पन्तले शनिबार वीरगन्जको गहवा क्षेत्रमा घरदैलो कार्यक्रम समेत गरेका छन् । घरदैलोका क्रममा स्थानीयले उनलाई उत्साहजनक स्वागत गर्दै आगामी निर्वाचनका लागि शुभकामना दिएका थिए। बालेन शाह र रवि लामिछानेको पछिल्लो राजनीतिक समीकरण र जिल्लामा बढेको जनलहरले गर्दा चुनावमा पर्सामा रास्वपाले बलियो प्रभाव जमाउने आमसर्वसाधारणको अनुमान छ ।
पछिल्लो समय देखिएको जनलहरका कारण परम्परागत दलका उम्मेदवारहरू दबाबमा परेका छन्।
स्थानीय तहदेखि प्रतिनिधि सभा क्षेत्रसम्म रास्वपाको सक्रियता र युवा मतदाताको आकर्षणले प्रतिस्पर्धालाई रोचक बनाएको छ। चुनावी अभियानका क्रममा आयोजित सभाहरूमा उल्लेख्य सहभागिता देखिएपछि विपक्षी उम्मेदवारहरू रणनीति फेरबदल गर्न बाध्य भएका छन्।
विशेषगरी युवा, शिक्षित तथा परिवर्तनको अपेक्षा राख्ने मतदाताहरू रास्वपातर्फ आकर्षित देखिनुले पर्सा–१ मा नयाँ शक्ति उदाएको संकेत मिलेको छ। अबको चुनावी परिणामले परम्परागत राजनीतिक समीकरणलाई चुनौती दिने संकेत देखिएको विश्लेषकहरूको भनाइ छ।
