काठमाडौं । गत १२ जुन २०२५ मा अहमदाबादमा भएको एयर इन्डियाको विमान दुर्घटनामा ज्यान गुमाएका व्यक्तिका परिवारहरूलाई थप क्षतिपूर्ति दिने बदलामा कानुनी मुद्दा फिर्ता लिन प्रस्ताव गरिएको छ । लन्डनस्थित अखबार ‘द इन्डिपेन्डेन्ट’ का अनुसार एयर इन्डियाले पीडित परिवारहरूलाई थप १० देखि २० लाख भारतीय रुपैयाँ दिएर सम्झौताको प्रस्ताव राखेको हो ।
कानुनी छुटको माग रकम बुझेपछि परिवारले भविष्यमा कुनै पनि देश वा अदालतमा कम्पनीविरुद्ध दाबी गर्न नपाउने र एयर इन्डियालाई सबै कानुनी जिम्मेवारीबाट मुक्त गर्नुपर्ने सर्त राखिएको छ ।
कानुनी टोलीको विरोध १३० पीडित परिवारका कानुनी प्रतिनिधिहरूले यस प्रस्तावको कडा विरोध गरेका छन् । अनुसन्धान जारी रहेको र कतिपय घाइतेको उपचार भइरहेको अवस्थामा मुद्दा हाल्ने अधिकार त्याग्न लगाउनु अनुचित भएको उनीहरूको तर्क छ ।
एयर इन्डियाको दाबी कम्पनीका प्रवक्ताले आफूहरू प्रभावित परिवारलाई सहयोग गर्न प्रतिबद्ध रहेको र दिइने अन्तिम रकम उचित एवं कानुनसम्मत होस् भन्ने सुनिश्चित गर्न चाहेको बताएका छन् ।
१२ जुन २०२५ मा अहमदाबादबाट लन्डनका लागि उडेको फ्लाइट एआई–१७१ टेकअफ गरेको केही समयमै एक मेडिकल होस्टेलको भवनमा ठोक्किएको थियो । यस दुखद दुर्घटनामा २४१ यात्रु र क्रू सदस्यसहित कुल २७० जनाको मृत्यु भएको थियो । उक्त दुर्घटनामा केवल एकजना यात्रु मात्र जीवित रहन सफल भएका थिए ।
यसैबीच, भारतीय सर्वोच्च अदालतले ११ फेब्रुअरी (२०२६) मा केन्द्र सरकारलाई विमान दुर्घटनाको अनुसन्धान सम्बन्धी ‘प्रोसिजरल प्रोटोकल’ रिपोर्ट पेस गर्न निर्देशन दिएको छ । सरकारका अनुसार एयरक्राफ्ट एक्सिडेन्ट इन्भेस्टिगेसन ब्यूरो (एएआईबी) को अनुसन्धान अहिले अन्तिम चरणमा पुगेको छ ।
