वीरगंज । वीरगंज महानगरपालिकाका विभिन्न सामुदायिक विद्यालयमा अध्ययनरत अपाङ्गता भएका १६ जना बालबालिकालाई शैक्षिक सहयोगस्वरूप आर्थिक सहायता उपलब्ध गराइएको छ।
‘सशक्त महिला, समृद्ध नेपाल’ कार्यक्रम अन्तर्गत लाइफ नेपालले महानगरपालिकासँगको सहकार्यमा ती बालबालिकालाई जनही ५ हजार रुपैयाँका दरले नगद सहयोग प्रदान गरेको हो।
महानगरपालिकामा आयोजित एक विशेष कार्यक्रमका बीच प्रमुख राजेशमान सिंहले बालबालिकालाई उक्त सहयोग रकम हस्तान्तरण गरे । सो अवसरमा नगरप्रमुख सिंहले अपाङ्गता भएका बालबालिकाको शिक्षा सुनिश्चित गर्नु राज्य र समाज दुवैको साझा दायित्व भएको बताए ।
आर्थिक अभावकै कारण कुनै पनि बालबालिका शिक्षाको उज्यालोबाट वञ्चित हुन नपरोस् भन्ने उद्देश्यले महानगरले विभिन्न दातृ निकायसँग मिलेर सहयोगात्मक कार्यक्रम अघि बढाएको उनको भनाइ थियो।
यस्ता कार्यक्रमले समावेशी शिक्षाको अवधारणालाई थप बलियो बनाउने विश्वास समेत उनले व्यक्त गरे । सहयोग वितरणको उद्देश्यबारे प्रष्ट पार्दै लाइफ नेपालकी प्रतिनिधि कञ्चन कोइरालाले सरकारी मापदण्ड अनुसार सेतो र पहेंलो परिचयपत्र प्राप्त गरेका बालबालिकालाई विशेष प्राथमिकता दिइएको जानकारी दिईन् ।
रातो र निलो परिचयपत्र भएका व्यक्तिहरूले सरकारबाट नियमित मासिक भत्ता पाउने भए पनि सेतो र पहेंलो कार्ड भएकाहरू सरकारी सुविधाबाट वञ्चित रहेको अवस्थालाई मध्यनजर गर्दै यो सहयोग उपलब्ध गराइएको उनले बताईन् ।
प्राप्त रकमले बालबालिकालाई शैक्षिक सामग्री, विद्यालय पोशाक र अन्य शैक्षिक आवश्यकता पूरा गर्न सहज हुने संस्थाको अपेक्षा छ।
सहयोग पाउने १६ जना बालबालिकामध्ये ६ जना बालिका र १० जना बालक रहेका छन्। आफ्ना बालबालिकाले शैक्षिक सहयोग पाएपछि अभिभावकहरूले खुसी व्यक्त गर्दै यसले पढाइलाई निरन्तरता दिन थप हौसला मिलेको बताएका छन्।
महानगर र गैरसरकारी संस्थाको यो संयुक्त पहलले अपाङ्गता भएका बालबालिकाको आत्मनिर्भरता र शैक्षिक विकासमा सकारात्मक प्रभाव पार्ने देखिएको छ।
