काठमाडौँ । काठमाडौँस्थित सैनिक मुख्यालयमा आज (शनिबार) ‘प्रधान सेनापति खुला म्याराथन प्रतियोगिता २०८२’ सम्पन्न भएको छ। नेपाली सैनिक शारीरिक तालिम तथा खेलकुद केन्द्रद्वारा आयोजित प्रतियोगिताको उद्घाटन प्रधानसेनापति अशोकराज सिग्देलले गर्नुभएको हो।
‘बलियो एकता, सुरक्षित राष्ट्र’ भन्ने नारासहित आयोजित प्रतियोगितामा ४२.१९५ किलोमिटर दूरीको पुरुष म्याराथन तथा महिला र पुरुष दुवै विधामा २१ किलोमिटर दूरीको हाफ म्याराथन सम्पन्न भयो।
म्याराथनतर्फ प्रथम, द्वितीय र तृतीय हुने धावकलाई क्रमशः तीन लाख, दुई लाख र एक लाख रुपैयाँ नगद पुरस्कार प्रदान गरिनेछ। हाफ म्याराथनमा महिला तथा पुरुष दुवै विधाका विजेतालाई क्रमशः एक लाख, ७५ हजार र ५० हजार रुपैयाँ पुरस्कार दिइने व्यवस्था गरिएको छ।
यस्तै, सैनिक अधिकृत, सैनिक सहचारी, सैनिक महाविद्यालयमा कार्यरत कर्मचारी, सेवारत तथा अवकाशप्राप्त सैनिक र गैरसैनिकतर्फ कक्षा १० देखि १२ सम्म अध्ययनरत सन्तानको सहभागितामा १० किलोमिटर दूरीको दौड आयोजना गरिएको थियो।
पाँच किलोमिटर दूरीको वाकाथनमा प्रधानसेनापति सिग्देलसहित सैनिक तथा गैरसैनिक व्यक्तिहरू सहभागी भएका थिए भने सैनिक महाविद्यालयमा अध्ययनरत कक्षा ७ देखि ९ सम्मका छात्रछात्राले पाँच किलोमिटर दूरीको दौड पूरा गरेका थिए।
दश किलोमिटर तथा पाँच किलोमिटर दौडमा प्रथम, द्वितीय र तृतीय हुने महिला र पुरुष विधाका धावकलाई क्रमशः १० हजार, सात हजार र पाँच हजार रुपैयाँ नगद पुरस्कार प्रदान गरिनेछ।
वि.सं. २०७२ देखि महाशिवरात्री तथा सेना दिवसका अवसरमा प्रत्येक वर्ष आयोजना हुँदै आएको यस ११औँ संस्करणको प्रतियोगितामा पाँच विधामा करिब दुई हजार पाँच सय धावकको सहभागिता रहेको थियो। यस वर्ष महाशिवरात्री तथा सेना दिवस आगामी फागुन ३ गते परेको छ।
