काठमाडौँ । आगामी प्रतिनिधिसभा सदस्य निर्वाचनका लागि निर्वाचन आयोगले समानुपातिक निर्वाचन प्रणालीतर्फको अन्तिम बन्दसूची सार्वजनिक गरेको छ। आयोगले सार्वजनिक गरेको विवरण अनुसार यस पटक समानुपातिकतर्फ पुरुषको तुलनामा महिला उम्मेदवारको सङ्ख्या उल्लेख्य रूपमा बढी देखिएको छ।
निर्वाचन आयोगका अनुसार अन्तिम बन्दसूचीमा कूल ३,१३५ जना उम्मेदवार कायम भएका छन्। जसमध्ये महिला उम्मेदवार १,७७२ जना पुरुष उम्मेदवार: १,३६३ जना छन्।
समानुपातिक निर्वाचन प्रणालीतर्फ कुल ६३ वटा राजनीतिक दल चुनावी मैदानमा उत्रिएका छन्। केही दलहरूले संयुक्त रूपमा एकल चुनाव चिह्न लिएका कारण आयोगले कुल ५७ वटा निर्वाचन चिह्न कायम गरेको छ।
प्रतिनिधिसभा सदस्य निर्वाचन ऐन, २०७४ र सम्बन्धित नियमावली बमोजिम जाँचबुझ गर्दा योग्यता नपुगेका ७६ जना उम्मेदवारको नाम बन्दसूचीबाट हटाइएको छ। कर्जा सूचना केन्द्रको कालोसूचीमा रहेका २१ जना, प्रदेशसभातर्फको समानुपातिक बन्दसूचीमा पनि नाम रहेका २५ जना, निर्वाचन आयोगले तोकेको जरिबाना भुक्तान नगरेका १० जना, सम्बन्धित राजनीतिक दलले नै नाम हटाउन पत्र लेखी पठाएका १० जना र अन्य प्राविधिक कारण मतदाता नामावलीमा नाम नभएका वा पिछडिएको क्षेत्रको प्रमाण नपुगेका उम्मेदवारहरूकाे नाम हटाइनु मुख्य कारण रहेकाे थियाे ।
आयोगले प्रतिनिधिसभा सदस्य निर्वाचन ऐन, २०७४ को दफा २९ र नियमावली, २०७४ को नियम १६ को उपनियम २ बमोजिम यो अन्तिम नामावली प्रकाशन गरेको हो। बन्दसूचीमा महिलाको सङ्ख्या बढी हुनुले नेपाली राजनीतिमा समावेशिता र महिला सहभागिताको बढ्दो प्रभावलाई संकेत गरेको छ।
