पर्सा । बलिउड महानायक अमिताभ बच्चनसँग मिल्दो नाम भएपछि अहिले चर्चामा रहेका पर्सा २ मा प्रगतिशील लोकतान्त्रिक पार्टीका उम्मेदवार अमिताभ बच्चन दास तत्माले घरदैलो कार्यक्रममा तीब्रता दिएको छ ।
उनको यो नाम त उनी जन्मेदेखि नै थियो तर परिवार, छिमेकी, साथीभाइ र आफन्तमाझ मात्रै सीमित थियो । निर्वाचनमा उम्मेदवार भएपछि भने उनको नाम निर्वाचन आयोगको रेकर्डमा प्रतिष्ट भयो, आयोगको वेबसाइटमा प्रकाशित भयो र मिडिया कभरेजका क्रममा मिडियासम्म पनि पुग्यो ।
उम्मेदवार भएसँगै उनको नाम धेरै ठाउँमा आउन थालेपछि उनको नाम पर्साबाहिर पनि उल्लेख हुन थाल्यो । बलिउड महानायकसँग मिल्दो भएकोले उनको नाम धेरैको चासोको विषय बन्दा उनको चर्चा बढेको हो ।
आगामी निर्वाचनको रौनक बढ्दै जाँदा पर्सा क्षेत्र नम्बर २ मा प्रगतिशील लोकतान्त्रिक पार्टीका उम्मेदवार अमिताभ बच्चन दासले आफ्नो चुनावी अभियानलाई तीव्र पारका छन् ।
उम्मेदवार दासले पर्सागढी नगरपालिकाको वडा नम्बर १ र २ अन्तर्गत पर्ने पशुपति नगर, वसवरिया, गुलरिया, कटानी, छतिवनटाडी र शान्तिनगरमा मंगलबार घरदैलो कार्यक्रम भव्य रूपमा सम्पन्न गरेका छन्। सो अवसरमा उहाँले मतदाताका समस्या प्रत्यक्ष सुन्दै आफ्नो भावी योजना र प्रतिबद्धताहरू प्रस्तुत गरेका छन् ।
घरदैलोका क्रममा मतदाताहरूसँग कुरा गर्दै उम्मेदवार अमिताभ बच्चन दासले युवाहरूलाई वैदेशिक रोजगारीमा जानुपर्ने बाध्यता अन्त्य गर्न स्वदेशमै रोजगारीको सिर्जना गर्ने, यस क्षेत्रलाई कृषि हबको रूपमा विकास गर्ने, गरिब तथा विपन्नका छोराछोरीका लागि निःशुल्क प्राविधिक शिक्षाको व्यवस्था गर्ने र गाउँगाउँमा गुणस्तरीय स्वास्थ्य सेवा पुर्याउने मुख्य संकल्प व्यक्त गरेका छन् ।
विगतका जनप्रतिनिधिहरूले आश्वासन मात्र दिएको तर काम नगरेको गुनासो गरिरहेका स्थानीय बासिन्दाहरूले यसपटक दासको भिजन र प्रतिबद्धताप्रति उत्साहजनक समर्थन जनाएका छन्।
घरदैलोका क्रममा भेटिएका आम मतदाताहरूले यसपटक परिवर्तनका लागि प्रगतिशील लोकतान्त्रिक पार्टीको निर्वाचन चिन्ह ‘आँखा’ छापमा मतदान गरी दासलाई अत्यधिक बहुमतले विजयी गराउने सामूहिक प्रतिबद्धता समेत व्यक्त गरेका छन्।
