वीरगन्ज । लोकप्रिय गायक तथा अभिनेता प्रशान्त तामाङको निधन भएको दुःखद खबर प्राप्त भएको छ। इन्डियन आइडल सिजन(३ का विजेता समेत रहेका तामाङको आइतबार दिल्लीस्थित आफ्नै निवासमा निधन भएको हो।
चलचित्रकर्मी राजेश घतानीका अनुसार उनको निधन हृदयघातका कारण भएको जनाइएको छ। सन् २००७ मा इन्डियन आइडलको उपाधि जितेपछि एकाएक चर्चामा आएका प्रशान्तले नेपाली र हिन्दी दुवै भाषाका गीतहरूमा आफ्नो सुमधुर आवाज दिएका छन्। उनी विशेषगरी नेपाली भाषी समुदायमा ‘पहाडको गौरव’ का रूपमा परिचित थिए।
गायनसँगै अभिनयमा पनि सक्रिय प्रशान्तले ‘गोर्खा पल्टन’ ‘परदेशी’, र ‘निशानी’ जस्ता सफल नेपाली चलचित्रहरूमा मुख्य भूमिका निर्वाह गरेका थिए।
पछिल्लो समय उनले बलिउडको चर्चित वेब सिरिज ‘पाताल लोक’ को दोस्रो सिजन र सलमान खानको फिल्म ‘ब्याटल अफ गलवान’ मार्फत बलिउडमा डेब्यु गरेका थिए। उनको असामयिक निधनले नेपाली संगीत र चलचित्र क्षेत्रमा अपूरणीय क्षति पुगेको छ।
