वीरगन्ज । सम्मुन्नत नेपाल पार्टीका अध्यक्ष एवं पूर्व प्रहरी महानिरीक्षक सर्वेन्द्र खनालले वर्तमान राजनीतिक दलका नेताहरूको अकर्मण्यताका कारण देशको अवस्था अत्यन्तै नाजुक बनेको टिप्पणी गरे ।
वीरगन्जमा आयोजित एक पत्रकार सम्मेलनमा बोल्दै उनले अन्तर्राष्ट्रिय समुदायबाट प्राप्त हुने आर्थिक सहयोग समेत भ्रष्ट नेता र कर्मचारीहरूको मिलेमतोमा अपचलन भइरहेको आरोप लगाए । यस्तो प्रवृत्तिले मुलुकलाई आर्थिक रूपमा कंगाल बनाएको भन्दै उहाँले गम्भीर चिन्ता व्यक्त गरे ।
खनालले देशमा शान्ति सुरक्षाको स्थिति खस्किएको र अपराधीहरू कारागार तोडेर भाग्ने अवस्थाले गर्दा अन्तर्राष्ट्रिय जगतमा नेपालको छवि बिग्रिएको बताए ।
यस्ता घटनाका कारण विदेशी पर्यटकहरू नेपाल आउन डराउने वातावरण बनेको उनको तर्क थियो। देशमा अशान्ति मच्चाउन खोज्ने तत्वहरू सक्रिय रहेको भन्दै उनले मुलुकको रक्षाका लागि सबै पक्षलाई सहयोग गर्न अपिल समेत गरे ।
सहकारी पीडितहरूको विषयमा बोल्दै अध्यक्ष खनालले सरकार ७० लाखभन्दा बढी नागरिकको पीडाप्रति उदासीन रहेको तर सहकारी ठगीमा मुछिएकाहरूलाई नै मन्त्री पद दिएर पुरस्कृत गरिरहेको आरोप लगाए ।
यो कदम तत्काल सच्चिनुपर्ने माग गर्दै उनले स्वविवेकीय अधिकारको दुरुपयोग गरेर राज्यले भ्रष्टहरूलाई संरक्षण दिइरहेको बताए । यस्ता बेथिति र आपराधिक मनोवृत्तिबाट देशलाई मुक्त गर्न नै आफ्नो पार्टी सक्रिय भएको उनले दाबी गरे ।
उनले भने, ‘तपाँईको पछाडि को को छन् ? कसरी देशलाई मुक्ति दिलाउनु हुन्छ भन्ने तपाँईहरुलाई लाग्न सक्ला ! म सँग पहिले काम गरेको अनुभवको आधारमा र मैले गरेका कामहरुको आधारमा भनि रहेको छु । म सात बर्ष भित्र देशलाई प्रतिव्यक्ति आय बढाएर आर्थिक रुपमा सम्पन्न बनाउने योजना लिएर आएको छु । यसमा तपाँईहरुले सहयोग गर्नुपर्छ ।’
खनालले सहकारी, लघुवित्त तथा मिटरब्याज पीडितहरुको न्यायको लागि आफू लडिरहेको बताउदै आगामी निर्वाचनमा आफ्नो मुख्य एजेण्डा त्यहि हुने पनि बताए ।
निर्वाचनमा धेरै ठाउँबाट चुनाव लड्न अनुरोध गरेको जानकारी दिदै आगामी निर्वाचनमा आफूले बाराको निर्वाचन क्षेत्र नम्बर ४ बाट निर्वाचन लड्ने मनस्थिति बनाएको बताए ।
