वीरगन्ज । बढ्दो चिसो र शीतलहरलाई मध्यनजर गर्दै जिल्लाबासीका नाममा विशेष सतर्कता अपनाउन जिल्ला प्रशासन कार्यालय पर्साले अपिल जारी गरेको छ।
सहायक प्रमुख जिल्ला अधिकारी विनोद कुमार पोखरेलले आज सूचनामार्फत बाक्लो हुस्सु र चिसोका कारण जनजीवन प्रभावित हुन सक्ने भन्दै सावधानी अपनाउन आग्रह गरेका हुन् ।
विशेषगरी बालबालिका, ज्येष्ठ नागरिक, सुत्केरी, गर्भवती र विपन्न समुदाय शीतलहरको उच्च जोखिममा रहने भएकाले उनीहरूको स्वास्थ्यमा विशेष ख्याल पुर्याउन प्रशासनले अनुरोध गरेको छ।
सूचनामा शरीर पूरै ढाक्ने गरी न्यानो लुगा लगाउन, तातो र झोलिलो खानेकुरा पर्याप्त मात्रामा खान तथा चिसोमा घरबाहिर धेरै समय नबस्न भनिएको छ। स्वास्थ्यमा कुनै समस्या देखिए वा श्वासप्रश्वासमा कठिनाइ भए तुरुन्त नजिकैको स्वास्थ्य संस्थामा सम्पर्क गर्न समेत आग्रह गरिएको छ।
हिउँदको समयमा हुने सम्भावित दुर्घटना कम गर्न कोठाभित्र आगो बाल्दा वा हिटर प्रयोग गर्दा झ्यालढोका खुला राखेर पर्याप्त अक्सिजनको व्यवस्था मिलाउन प्रशासनले सचेत गराएको छ। साथै सुत्नुअघि अनिवार्य रूपमा आगो निभाउन र विद्युतीय उपकरण बन्द गर्न भनिएको छ। सडकमा लाग्ने बाक्लो हुस्सुका कारण सवारी दुर्घटना हुन सक्ने जोखिमलाई ध्यानमा राख्दै फग लाइटको प्रयोग गर्न र सीमित गतिमा सवारी चलाउन पनि निर्देशन दिइएको छ।
मानवीय स्वास्थ्यका साथै पशुचौपायाको सुरक्षाका लागि पनि प्रशासनले विशेष आग्रह गरेको छ। घरपालुवा पशुपन्छीलाई खुला स्थानमा नराखी न्यानो गोठमा राख्न र बिरामी परेमा पशु चिकित्सकको सल्लाह लिन सुझाइएको छ। यता सर्वसाधारणलाई राहत दिन स्थानीय तहमार्फत दाउरा वितरणका लागि डिभिजन वन कार्यालयसँग समन्वय र पहल भइरहेको समेत जिल्ला प्रशासन कार्यालय पर्साले जनाएको छ।
यसैबीच चिसो बढेपछि महानगरपालिकाले मंगलबारदेखि नै ११ गतेसम्मका लागि सामुदायिक र संस्थागत विद्यालयहरुमा विदा दिएको छ । अन्य बिदामा मिलान गर्ने गरी विद्यार्थीहरुको स्वास्थ्यलाई ध्यान दिदै बिदा दिने निर्णय गरेको महानगरपालिकाले जनाएको छ । अन्या पालिकाहरुले पनि चिसोका कारण धमाधम विद्यालय बिदा दिन थालेका छन् ।
