कलैया। भौतिक पूर्वाधार तथा यातायात मन्त्री कुलमान घिसिङले बारा जिल्लाको सदरमुकाम कलैयाको मुख्य सडक निर्माणमा भएको १४ वर्ष लामो ढिलाइप्रति कडा असन्तुष्टि व्यक्त गर्दै ठेक्का तोड्ने चेतावनी दिएका छन्।
मधेश प्रदेशमा १५ वर्षदेखि अधुरा रहेका विकास योजनाहरूको अनुगमन गर्न आउने क्रममा मन्त्री घिसिङले कलैया सडक खण्डको काम छिटो सुरु नभएमा ठेकेदारलाई कारबाही गरी नयाँ टेण्डर प्रक्रियामा जाने बताएका हुन्।
२०६८ सालमा भारतीय कम्पनी भिस्वा कन्ट्रक्सनले सुरु गरेको मटिअर्वा–मानमत सडकको २७ किलोमिटरमध्ये हालसम्म साढे तीन किलोमिटर सडक खण्ड अधुरो छ। पछिल्ला कम्पनीहरूले पनि जिम्मेवारी पूरा नगरेपछि हुलाकी मार्ग आयोजनाअन्तर्गत करोडौं खर्च भइसक्दा पनि स्थानीय बासिन्दा वर्षौंदेखि धुलो र उबडखाबड सडकको समस्याबाट पीडित छन्। मन्त्री घिसिङले अब थप ढिलाइ स्वीकार्य नहुने स्पष्ट पारेका छन्।
यसैबीच कलैयाको सडक समस्या चुलिएकै बेला जेन्जी र बाराका युवाहरूको एक समूहले जिल्लाको भौतिक पूर्वाधारको दिगो विकासका मागसहित मन्त्री घिसिङलाई ज्ञापनपत्र बुझाएका छन्।
युवाहरूले भारतको रक्सौल नाकादेखि कलैयासम्मको सडक मापदण्डअनुसार निर्माण गर्नुपर्ने, सिमरा–कलैया हुँदै निजगढ जाने सडक चौडा र कालोपत्रे गर्नुपर्ने, दक्षिण र उत्तर बाराका सडकको अविलम्ब निर्माण सुरु गर्नुपर्ने माग गरेका छन्।
साथै, कलैयालाई राष्ट्रिय सडक सञ्जालमा समावेश गर्नुपर्ने र यातायात कार्यक्रमहरूमा हुने भ्रष्टाचार रोक्नुपर्ने विषयलाई पनि जोड दिइएको छ। युवाहरूले अन्य प्रदेशको तुलनामा बाराको भौतिक पूर्वाधार विकासलाई कम प्राथमिकता दिइएको भन्दै संघीय सरकारको ध्यानाकर्षण गराएका छन् र तत्काल आवश्यक बजेट, नीति तथा कार्यक्रममार्फत प्राथमिकता दिन आग्रह गरेका छन्।
